Shillong, Rymphang, 27: U MLA ka BJP na South Shillong Bah Sanbor Shullai ha ka sngi Baar ula aiti da ka shithi ha u State President ka BJP u Rikman G. Momin da ka jingkyntu ba ka party kan mynjur ïa ka Dr. Fenela Lyngdoh Nonglait kum ka kyrtong na Shillong Parliamentary Constituency ha ka elekshon Lok Sabha ka ban sa long shen.
U Bah Shullai u la kyrpad ruh ïa u Bah Alexander L. Hek, uba dei ruh u Myntri ka Sorkar Jylla bad u MLA ka BJP na Pynthorumkhrah, ban ai jingkyrshan ïa ka Dr. Nonglait bad ha kajuh ka por u la kyrpad ruh ïa u State President barim ka party Bah Ernest Mawrie ban weng noh ïa ka jingpan tiket bad ban ai ka jingïatreilang.
Ha ka jingïakren bad ki lad pathai khubor hadien ka jingïakynduh ïa u State President, u Bah Shullai u la ong, “nga la wan lang bad ki nongkitkam jong ka South Shillong Mandal ban aiti ïa ka shithi ha u State President ban pynpaw ïa ka rai ba ngi la shim ban ai jingkyrshan ïa ka Dr. Fenela Lyngdoh Nonglait. Ngi kyntu ruh ïa ka party ba kan pdiang ïa ka (Dr Nonglait) kum ka kyrtong jong ka party ban ïakhun na Shillong Parliamentary Seat.”
“Ka Dr. Fenela Lyngdoh Nonglait ka dei ka Gold Medallist ha ka Law. Ka jingnang jingstad ba ka la don kan long kum ka jingmihkhmat ïa ka imlang ka sahlang jong ngi kaba aijait sha ka kmie. Nalor, ba ka long ka briew kaba khuid bad ka jingtuklar biang por ïa ki jingeh kan ïarap ïa ngi ban ïoh ïa ka vote na ki thaiñ nongkyndong ruh,” u la ong.
U Bah Shullai u la ïathuh ruh ba ïa ka shithi ba la aiti sha u National Vice President In-charge Meghalaya u Dr Chuba Ao, sha u National General Secretary bad Coordination ki Jylla ka North East u Rituraj Sinha kum ka jingpyntip.
U Bah Shullai u la ïathuh ba u la ïakynduh ïa u Bah Hek ban ïakren sani halor kane ka kam mynta ka sngi.
“Ngam shym ïohlad ban ïakynduh ïa u (Hek) namarba um shym la wan sha Assembly. Dang mynta hi ka sngi nga ïoh jingtip ba um lah ban ïaid namarba u shitom. Ngan sa ïakynduh ïa u bad ngan sa ïakren markhmat khnang ba ma gni arngut ki MLA ngin kyrpad ïa ka High Command jong ka Party ban mynjur ïa ka Dr. Fenela Lyngdoh Nonglait kum ka kyrtong na Shillong Seat,” u la ong.
“Nga ladep ïakren ruh bad u Bah Ernest Mawrie (bad kyrpad ïa u) lada u la lah ban weng noh ïa ka rai khnang ba ngin dup lah ban ïatreilang,” ula ong bad ïathuh ba u Bah Mawrie u la ong ba un ap shwa ïa ka rai jong ki nongïalam bahalor jong ka party.
Shuh shuh u Bah Shullai u la ong ba ki paidbah ka rilum Khasi bad Jaiñtia ki la babe ba ki la jied ïa u Bah Vincent H Pala. “San snem ha Parliament, u Bah Pala u la shu pynlut por tang ha kaba bam sohot,” la kynnoh u Bah Shullai.
U Bah Shullai u la shah rem ha ka jingïakhun ïa ka elekshon Lok Sabha kaba la long ha u snem 2019. U la kam ba u Myntri ka tnat Kam Pohing u Amit Shah u ladep ïakren bad u lyngba ka telephone bad kular ruh ba yn thung ïa u kum u Myntri ka DoNER lada u jop ha ka elekshon 2019.
“Ka jingkyrpad jong nga sha ki paidbah ka long ba ki dei ban long kiba ïohi jngai bad ban ai ïa ka vote na ka bynta ka BJP. Kan long ka jingkyrkhu lada ka party ka ai tiket ïa ka Kong Fenella bad lada ka jop khlempep kan ïoh ïa ka shuki Myntri bad ha kata ka por kan wanrah ïa ka dud bad ka ngap sha ka Jylla, kan wanrah shibun ki kam pynroi ban pynkha ïa ki lad ïohkam ïohjam sha ki paidbah ka jylla,” u la ong.
“Lada ki samla ki kwah ïa ka kam ki dei ban ai ïa ka vote sha ka BJP. Ailad shisien ïa ka BJP,” la kyrpad u Bah Shullai.
