Shillong, Lber, 19: U Myntri Rangbah ka Jylla u Conrad K. Sangma ha ka sngi Balang u la ïakynduh ïa u Myntri ka Sorkar Pdeng uba khmih ïa ka tnat Social Justice and Empowerment u Dr. Virendra Kumar bad kyrpad ïa u ban tuklar lem na ka bynta ban ïoh tei noh ïa ka Sports Centre for Persons with Disabilities ha Meghalaya, ka ban sa ïoh pynlong ïa ka National Games ha u snem 2027.
Ha ka shithi sha u Dr. Kumar, u Sangma u la ong, “nga pan ïa ka jingkyrkhu jong phi ha kaba phi lah mang ïa ka jaka ïalehkai na ka bynta ki briew kiba don jingduna ha ki dkhotmet ha ka Jylla Meghalaya bad nga pynthikna ïa phi ïa ka jingkyrshan bad ka jingïatreilang kaba pura jong ka Sorkar Jylla ban pyndep ha ka por kaba biang ïa kane ka projek ïalehkai kaba donkam bha.”
U Myntri Rangbah u la ai khublei ruh ïa u Myntri ka Sorkar Pdeng uba la shimkhia ban tei san tylli ki Centre for Disability Sports na ka bynta ki briew ba don jingduna ha ki dkhotmet ha kylleng ka ri.
“Nga thikna ba kane ka jingthmu kan ïarap shibun ha kaba ithuh ïa ka jinglah jong ki briew kiba don jingduna ha ki dkhotmet ynda la seng ïa ki.
Kan long ka jingsngewsarong ïa ngi ba kawei na ki Disability Sports Complex kan don ha Shillong, Meghalaya.Kane ka Centre kan shakri ïa ka thaiñ Shatei Lammihngi ha kiba bun ki liang bad ka Meghalaya khamtam ha kaba kum kine ki jaka ïalehkai ki long kiba donkam bha,” ong u Sangma.
Haba pyntip ba ka Meghalaya kan sa pynlong ïa ka National Games ha u snem 2027, u Myntri Rangbah u la ong, “kum kane ka jaka ïalehkai na ka bynta ki briew kiba don jingduna ha ki dkhotmet kan long ka jingnoh synñiang kaba khraw ban pynbiang ïa ki jingdonkam kiba donkam na ka bynta ka National Games.”
U la ong ba ka Sorkar ka ladep ïakren bad ka Department of Persons with Disabilities ba 40 akar ka jaka ha Mawkhanu, Mawpdang, New Shillong Township (NST) ladep aiti na ka bynta kane ka jingthmu ban shna ïa ka jaka ïalehkai sports bad ïa kane ka jaka yn sa lah ban shim rai da kaba ïasyllok bad ki ophisar jong ka Sorkar India.
“Ngi la sngewsarong ban pdiang ïa ki ophisar na ka tnad jong phi ha ka 13 tarik, Rymphang, 2025. Ka jingwan jong ki ka la pynskhem ïa ka jingkitkhlieh jong ngi ïa kane ka projek bad ngi long kiba kloi ban ïatreilang bad ka tnad jong phi ban pynurlong ïa kane ka jingthmu,” u la ong bad pynthikna “…ngi aiti pura ïa kane ka projek ha ki kyrdan ba ha khliehduh bad ba ka Jylla kan pynbiang ïa ka jinglut jingsep na ka bynta baroh ki jingdonkam na ka bynta ka Centre for Disability Sports.”
