Shillong, Nailar 08: U MDC ka Tura u Bernard N Marak u la kyrpad ïa u Myntri Rangbah ka jylla u Conrad K Sangma ban buh noh da ka jaka sah ne camp na ka bynta ki Garo, Khasi bad kiwei ki riewlum kiba wanrung sha India na ri Bangladesh bad ban pynïoh ruh ka jaka sah bad ki lad jingïarap na ka bynta jong ki. Kane ka jingjia umsnam kaba la jia ha Bangladesh ka la wanrah ka jingduh ki mynsiem kiba lui lui bad kumjuh ruh ïa ki briew kiba wan na sha khappud bad na ka jingma kaba ap ïa ki kaba lah ruh ban poi shaduh ka jingshah siat ha ki bor jong ka aiñ.
“Kito kiba la jam sha khappud ba ki dei ban ïoh ka jingithuh ban pynbiang ki jaka sah. Ki la don bun ngut ki riewlum ba kynthup ïa ki jaitbynriew Garo kiba sah ha Bangladesh bad lada kim ïoh ka jaka riehtngen kan long ka jingma ïa ki bad halor kane dei ban ai ki lad jingïarap kiba mardor ïa ki briew ka jylla bad lada ka jinglong jingman ka la long kaba suk ba saiñ dei ban phah leit phai biang wat ïa kito kiba wan sha kane ka jylla jong ngi,” ong u MDC ka Tura.
U la ong ba ha Garo Hills, ka rukom treikam ka Mahari ka dei kaba khlaiñ bha hapdeng ki jaitbynriew Garo bad kumta dei ban pyndonkam bha kum ka “Chatchi” (Clan) ne ka kur ban ïarap pynshisha, ban pynphai noh sha Bangladesh.
“Baroh ki Mahari ki don ki bahaïing hasem ne ki chatchi ha Bangladesh bad ha kane ka por ba don kane ka jingjia umsnam, ïa ki lanot dei ban ai ki jingïarap hynrei ym ban phai da lyndet ïa ki ban shah pynshitom, shah pynïap ha katei ka ri,” ong u MDC ha ka shithi ba la phah sha u Myntri Rangbah ka jylla.
