Shillong, K’lyngkot, 13: U MLA jong ka VPP na North Shillong Constituency u Bah Adelbert Nongrum ha ka Lah Sngi u Blei u la phah da ka jingthoh sha u Chairman jong ka Meghalaya Public Service Commission (MPSC) Shillong ban pynkynkynriah ïa ka sngi thoh eksamin na ka bynta ka post Junior Divisional Accountant hapoh ka Administrative Control jong ka Director of Accounts and Treasuries ka ban long ha ka 24 tarik, Rymphang, 2025.
Ha ka dorkhas, u Bah Nongrum u la ong pynpaw ïa ka jingsngewkhia halor ka jingeh ba la ïakynduh da ki nongthep kam kiba aplai ïa ka JDA (Junior Divisional Accountant) bad Staff Selection ha kaba baroh ar tylli ki eksamin kin long ha kajuh ka sngi.
“Hynrei ki don ki nongthep kam kiba la pas ïa ka preliminary exam jong ka Staff Selection kiba hap ban ïakhun pat sa ïa ka Main Exam ha kane kajuh ka sngi kaba ïatakhuh bad ka jingpynlong ïa ka eksamin JDA ba la pynlong da ka MPSC,” la ong u MLA bad bynrap, “nga sngew ba ka ophis jong ka MPSC kum ka tnat treikam ba laitluid kan pyrkhat lem ban pynkylla ïa ka rai da kaba pynkylla noh ïa ka tarik khnang ba kan ym pynduhnong ïa ki nongthep kam kiba la pynkhreh shitom khnang ba kan ym ktah ïa ka lawei jong ki bad kan ym long ruh ka jingduhnong ïa ka jylla baroh kawei.”
“Kumba la kdew hangne, nga kyrpad ïa phi ban pynkynriah noh ïa ka sngi na ka bynta ka jingmyntoi jong ki nongthep kam,” u la bynrap.
Da kaba pynpaw ruh ba kane ka kam ka long kaba kyrkieh, u Bah Nongrum u la ong shuh shuh, “ka jingpyrkhat bad ka jingmynjur ba sbun jong phi ha kane ka kam kan ai mynsiem ïa ki samla jong ngi bad kan pynpaw ruh ïa ka jingangnud jong ka Commission ïa ka jinglong hok bad ka lad na ka bynta baroh.
