Shillong, Naiwieng, 06: U Vice Chancellor jong ka skulbah North Eastern Hill University (NEHU) u Prof PS Shukla ha ka sngi Balang u la kyrpad ia ki samla pule bad ia ki nongtrei ba kin pynkut noh ia ki jingiakhih ba khlem pud sngi.
U la ong ba ka jingdawa ban weng kam ia u Registrar, ia u Deputy Registrar (Academics), ym ym lah ban pyntreikam katkum ka jingdawa jong ki kynhun bapher bapher lane katkum ka jingsngewthuh shimet.
Katkum ka jingong jong u, ka Sorkar ka lah ban thaw ia ka Inquiry Committee ban bishar ia ka jingdawa na ka bynta ban weng kam ia ki, lada ka suba ba ka don kano kano ka jingdkoh ha kaba thungkam ia ki.
U la kular ba ka jingthungkam na ka bynta ki posts jong ki Non-teaching Staff yn sa pynsdang noh shen tang shu plie ia ka ophis jong u Registrar, namarba la shu khang khyrdep na ka jingiakhih kaba dang iai bteng haduh mynta.
Baroh ki jingtreikam ha ka skulbah NEHU kaba pawnam ki la sangeh lut hadien ba ka mih ka jingiakhih ha kajuh ka por ba la khot pynlong da ki samla pule bad da ki nongtrei jong kane ka skulbah.
Ki samla pule hapoh ka shatri jong ka North Eastern Hill University Students Union (NEHUSU) ba la kyrshan da ka Khasi Students Union, NEHU Unit ki la pynlong ia ka jingshah thngan ba khlem pud sngi bad pynbna ruh ban khang dam pura ia ka skulbah kum ka dak ban pyrshah ia ka jingbym lah ban weng kam ia u Registrar, ia u Deputy Registrar (Academics), ia u Officer on Special Duty (Director, College Development Council) bad ia u Guest House In-charge, katba ki nongtrei kiba don hapoh ka shatri jong ka NEHUNSA ki la pynlong ia ka jingsangeh treikam ba khlem pud sngi mynta la lai sngi kynthih ban pyrshah ia ka jingpynslem ban pynkiew kyrdan bad ban thungkam ia ki post bapher bapher naduh ba la pynmih ia ka Advertisement ha u Naiwieng, 2023.
Ha ka jingiakren bad ki lad pathai khubor u Prof Shukla u la ong, “ia ka jingdawa ban weng kam ia u Registrar, ia u Deputy Registrar (Academics), yn ym lah ban shu pynshong nongrim na ka jingdawa jong ki kynhun ne na ka jingsngew shimet. Kine ki ophisar, kynthup ia u Registrar bad ia u Deputy Registrar, la thung lyngba ka jingpynlong ia ka jingbishar bniah bad ka interbiw. Ki kam jong ki bad ka jingiai bteng ban trei ia ka kam la teh da ki kyndon, ym da ka rai shimet na kano kano ka bor ba marwei, kynthup ia u Vice-Chancellor.”
Da kaba pynpaw ba ki Association kum ka NEHUTA, NEHUNSA, bad ka NEHUSU ki ladep thoh sha ka Sorkar kynthup sha ka President jong ka ri India, u Prof. Shukla u la ong, “lada ka Sorkar ka suba ba ka don kano kano ka jingleh bymsuidniew, ka lah ban thaw da ka Inquiry Committee ban bishar ia kane ka kam. Hynrei kumba ka long mynta, kam shym la don kano kano ka jingpyntip na ka Ministry lane ne ka ophis jong ka President sha ka ophis jong u Vice-Chancellor kaba kdew ba donkam ban leh eiei halor kane.”
“Ka long kaba donkam ban tip ba ka jingpynkut noh ia ka kam jong u nongtrei sorkar kam lah ban long khlem ki daw kiba biang bad kiba thikna. Lada ki don shisha ki jingsngewkhia ne ki daw na ka bynta kano kano ka jingleh kaba kum kane, ka jingtreikam kan sdang da ka jingtohkit, ym da ka jingweng kam noh mardor,” u la bynrap.
Haba kaba iadei bad ka kam jong u OSD (Director, College Development Council), u Prof Shukla u la ong, “nga la iakren bad kiba bun ki Professor ban shimti ia kane ka kam. Hynrei ym don uwei na ki, kiba mynjur.”
U la kular, “nga dang iai ap ban thung ia uno uno u Professor uba kloi ban trei kum u Director of College Development Council bad kum u Guest House Incharge, NEHU kaba mad mynta ia ka jingduna jong ki nongtrei.”
Halor ka mat ba la kdew da ka NEHUNSA ha kaba iadei bad ka jingpynslem ban thung ia ki nongtrei, u Prof Shukla u la ong ba ka Advertisement na ka bynta ban thungkam ia ki nongtrei ladep ban pynmih bad watla ka National Testing Agency (NTA) ka la kyntait ban pynlong ia ka written examination, ngi la iaid shakhmat ban khot tender da kiwei pat ki Agency.
“Bun na ki Agency ki la pynpaw ia ka mon, bad tang shu plie ia ka ophis u Registrar’ (ba la khang tala na ka jingiakhih), ia kine ki File yn sa phah noh mardor. Ynda la pyndep pura ia ka jingthungkam, yn sa thung ia u Guest House Incharge bapura,” la kular u Prof. Shukla.
Ha kaba iadei bad ka jingdawa ban thung Pro-Vice Chancellor ha Shillong bad ha Tura Campus, u Vice Chancellor u la kular ba ka jingthung ia ki arngut ki Pro-VC na ka bynta ka Shillong bad Tura kan long hapoh u bnai Nohprah, lada kam don kano ka jingai ktien na ka Sorkar ban pynshai halor kane ka kam.
“Nga kwah ban pyntip ia phi ba ka University ka ladep ban phah da ka jingthoh sha ka Ministry na ka bynta ban pynshai shuh shuh halor kane ka mat bad ngi dang ap ia ka jubab jong ki. Ngan sa thoh biang sha ka Ministry sa shisien bad lada kam don kano kano ka jingai jubab hapoh u Nohprah 2024, ngan sa thung hi ia ki arngut ki Pro-Vice-Chancellor na ka bynta ka Shillong bad ka Tura Campuse napdeng ki trai ri trai muluk,” u la ong.
Shuh shuh, u VC ula ong ba un sa khot iakren noh mardor ia ki samla pule bad ia ki nongtrei na ka bynta ban iathir iatai bad ban pynurlong ia ki jingdawa jong ki.
“Sngewbha wan shakhmat ban iakren halor kane ka kam. Tang ka jingiathir iatai kaba lah ban weng ia ki jingeh. Kam don da kawei pat ka lynti. Wan sha ka miej jingiakren ban iathir iatai katkum ki kyndon, ki aiñ bad ki rul. La teh ia nga da ki rul bad ki kyndon. Nga long uba kloi ban iakren bad ki samla pule jong nga bad kumjuh bad ki nongtrei,” la ong u VC.
Da kaba kyntu ia ki ban pynkut noh ia ka jingiakhih, u Prof Shukla u la ong, “ka jingkyrpad jong nga ia ki samla pule, ia ki nongtrei bad kumjuh ruh lada ki nonghikai ki don bynta lang, sngewbha ban pynkut noh ia ki jingiakhih na ka bynta ka bha ka miat jong ki samla pule ka NEHU. Kaei ka ban jia lada ka jingiakhih kan dang iai bteng? Khlem pep, ka eksamin kan ktah. Mano ban jynjar? Namarkata, wan sha ka miej jingiakren nga long uba kloi ban sngap ia ki jingeh da ka lynti ka jingiakren.”
Haba kylli, u VC ula ong ba u ladep ban iakren bad ka NEHUNSA bad shen un sa pynmih ia ka jingthoh kum ka jubanlak ban pynurlong ia ka jingdawa jong ki.
Ha kajuh ka por, u VC ula ong ba yn ym hiar shuki wat hapdeng ka jingdawa jong ki kynhun bapher bapher.
“Ngam pat long uba kloi ban hiar shuki. Ia nga la thung da ka President jong ka ri India. Ngan kohnguh ia ka rai kaba la shim da ka President ka ri India,” u la ong shuh shuh.
Ha kajuh ka por, ka NEHUNSA ka la pynbna ba ka la shim rai ban pyllait ia ka Examination Department na ka jingsangeh treikam na ka daw ka jingdon ki eksamin Undergraduate ki ban sa long, naduh ka 11 tarik, Naiwieng.
