Shillong, ïaïong, 03: Ka Khasi Students Union, Wapung Unit bad ka Federation of Khasi Jaiñtia and Garo People (FKJGP) Khliehriat Circle ki la ai ka jingkyrshan bapura ïa ka Dorbar Shnong Wapungskur ka bym shym la ailad ïa ka jingthmu jong ka Om Om Coke ban tei ïa ka Lam Coke Manufacturing Unit hapoh u pud u sam jong ka shnong Wapungskur, East Jaiñtia Hills District.
Ha u kyrwoh, ka KSU ka la ong, “ka seng kumba ka ju ieng ha ka nongrim ban ïada ïa ka khyndew ka shyiap ka ri mynta ka kynti ruh ka ai jingkyrshan ïa ka Dorbar Shnong Wapung skur ban ym ailad satia ban tei ïa ka kharkhana”
Ka seng ka dawa ïa ka Meghalaya State Pollution Control Board (MSPCB) ban pynduh pyndam shisyndon ïa ka Consent to Establish (CTE) bad ban ym ïaid shakhmat ban ai jingbit. “Ka seng ka dawa ïa u Dolloi bad ïa u Waheh Shnong ka Mookhep ban pyndam noh mardor ïa ka No Objection Certificate (NoC),” ong u kyrwoh na ka seng.
“Kum ban shu pynkynmaw ba ka seng ha ki snem ba ladep ka la ujor sha ka MSPCB ïa kawei na ki Coke Plant, kata, ka Abhi Coke kaba don ha Mookhep hynrei haduh mynta ym shym la ïohi ïa ki dak ki shin ban tehlakam ïa ka jingmih jakhlia na kane ka Coke Plant,” la pyntip ka seng.
“Ka seng kan sa ïai buddien halor kane ka kam bad yn sa shim ruh ïa ki lad ki lynti ba tyngeh,” la bynrap u kyrwoh.
Katba ka FKJGP-Khliehriat Circle ka la ïaroh ïa ka jingstad jong ki nongïalam shnong bad ki nongshong shnong ka Shnong Wapungskur kiba la shim ïa ka rai ban kyntait ïa ka Om Om Coke ban shna ïa ka karkhana Coke.
“Baroh ngi tip ba ki Coke Plant ki pynsniew ïa ka lyer kaba khuid. Ka seng ka sngewphylla ruh ban ïohi ba balei ki Coke Plant ki kwah pynieng ïa ka karkhana jong ki barabor hajan ki shnong ki thaw bad balei kim wad sha ki jaka ba jngai na ka shnong bad wat kawei kaba la don lypa ha Mookhep kaba kyrteng ka Abhi Coke haba ïaid lynti jan phin ym lah satia ban ring mynsiem namarba ka lyer kaba mih ka sma iwtung shaba palat,” ong u kyrwoh na u President ka seng u Bah Michal Chyrmang.
“Ka seng ka pynrem jur ïa u Waheh Shnong jong ka shnong Mookhep halor ka jingrai marwei jong u ban ai NoC ïa ka Om Om Coke. Ka seng ka ïohi ruh ïa ka jingkynrei ki dukan kiad beaiñ ba don laisen hapoh ka shnong Mookhep. Kane ka buh jingma ïa ki khun samla ka thañ bad ngi pynrem jur ïa u Dolloi ka Elaka Jwai bad ïa ka JHADC kiba ai NoC kulmar khlem ka jingbishar kaba bniah bad kumjuh ïa ka MSPCB kaba ai ïa ka CTE khlem da bishar bniah lada peit,” la ong shuh shuh ka seng.
“Kumne ki shnat treikam kim pat long kiba bit ban trei ïa ka kam naduh u Dolloi,u Waheh Shnong,ka JHADC bad ka MSPCB,” la kynthoh ka seng bad bynrap ba ka seng kan sa pynher da ki jingthoh sha bor bahalor ban dawa ba dei ban pynsangeh ïa ka Coke Plant.
