Shillong, K’lyngkot, 31: Ka kynhun ki San Synjuk kiba kynthup ïa ka Synjuk ki Rangbah Shnong Nongthymmai Pyllun, Synjuk ki Rangbah Shnong Laitkor Pyllun, Synjuk ki Rangbah Shnong Shilliang Umkhen, Synjuk ki Rangbah Shnong Pynthorumkhrah bad ka Synjuk ki Rangbah Shnong Upper Shillong ki la shong jingïalang kyrkieh ha ka janmiet sngi Thohdieng ban ïa pyrkhat halor ka jingthoh ba la phah da ka Voice of the People Party (VPP) sha ka tnat District Council Affairs (DCA) ka Sorkar Jylla ban ai hukum ïa ki Dorbar Shnong ba ki dei ban ai jingbit na ka bynta ban pynlong ïa ki jingïalang ïalap elekshon ha ki shnong bapher bapher.
Ha ka jingïalang ka kynhun ki San Synjuk ki la khot lang ruh ïa ka Mawlai Town Dorbar (MTD) ban ïakren halor kane ka mat ïa kaba la ai jingpynshai kaba bniah na ka Mawlai Town Dorbar lyngba u Secretary u Dr. Marco Mitri.
Dang shen ha ka shithi ujor ba u Secretary ka VPP u Dr. Ricky AJ Syngkon ula thoh sha u Commissioner and Secretary ka tnat DCA, u la pynpaw ba ki kyrtong jong ka party ki la ïakynduh jingeh ban ïoh jingbit na ka bynta ban pynlong ïa ki jingïalang ïalap elekshon na ki ophis jong ki Dorbar Shnong/Rangbah Shnong/Sordar Shnong jong ka rilum Khasi bad Jaiñtia. U Secretary ka VPP u la kdew ha ka shithi jingujor ba kane ka jingbym ïoh jingbit na ki katto katne ki Rangbah Shnong ka ktah ïa ka hok laitluid kumba la kdew ha ka riti synshar jong ka ri India katkum ba la kdew ha ka Article 19 (1).
Tang shu ïoh pdiang ïa ka jingthoh na ka VPP ka tnat DCA jong ka Sorkar Jylla ha ka sngi Palei ka la pynmih ïa ka hukum kaba bthah ïa ki Dorbar Shnong ba ki dei ban ai jingbit ïa ki seng saiñpyrthei ba kin pynlong ïa ki jingïalang paidbah kynthup ïa ki kyrtong shimet.
Hynrei tang hapoh 24 kynta, kata ha ka sngi Thohdieng ka tnat DCA ka la pynmih biang sa kawei ka jingbthah ban pynshai ïa ka jingbthah kaba rim da kaba ong, ‘kito ki Rangbah Shnong/Dorbar Shnong kiba la rai ban ai jingbit tang ban pynlong ïa ka Common Platform na ka bynta ka jingïalang ïalap elekshon jong ki seng saiñpyrthei bad ki kyrtong shimet la shah ba kin leh kumta.”
Ha ka jingïakren bad ki lad pathai khubor, u Convener jong ka synjuk u Bah Bantylli Narry u la ïathuh ba ha ka jingïalang la dawa ïa ka Voice of the People Party (VPP) ba kan ai jingpynshai halor ka jingphah ïa ka jingthoh sha ka tnat DCA.
“Hadien ba ngi la ïoh jingpynshai bad ngi la sngewthuh shai ïa kiei kiei baroh, ka Synjuk ka la pynpaw ïa ka jingsngewrem ba ka jingleh jong ka VPP ka dei kaba ktah mationg ïa ki Dorbar Shnong namarba kam pat ju jia mynno mynno ruh bad ha kino kino ki elekshon ba ki bor Sorkar kin hukum ïa ki Dorbar Shnong namarba baroh shi katta ki Dorbar Shnong ki tip la ka jong ka kamram namarba ki dei kiba long pdeng bad kim ju don kano kano ka jingïashah liang,” ong u Bah Narry.
U Bah Narry u la ong, ym dei tang kita ki briew kiba ieid jaitbynriew hynrei baroh kiba ieid ïa ka jaitbynriew bad ki Rangbah Shnong leilei ki kit ïa ka kam shnong khlem kano kano ka jingsiew.
“Lada ki Dorbar Shnong ki ïap kynmaw ba ka jaitbynriew ka la ïap bad yn ym don kino kino ki seng saiñpyrthei kiba lah ban ai jingïada lait na ki Dorbar Shnong. Lada ka shah ka kam ban lum da ka jingïalang kaba kham heh ïa baroh ki Synjuk Rangbah Shnong kim banse ban leh ïa kata,” u la bynrap.
