Shillong, Naiwieng, 12: Ka Congress, ka la lum palat 10 hajar ki jingsoi kyrteng ha Meghalaya, kum shi bynta ka jingïalap jong ka party hapoh ka jingïalam jong u Rahul Gandhi, ban pyrshah halor ka jingkynnoh ba ka don ka jingleh buittuh ha ka elekshon.
“Ka Congress ka la sdang ïa ka jingsoi kyrteng ha kylleng ka ri da ka jingthmu ban lum palat 5 klur tylli ki jingsoi kyrteng na baroh ki bynta jong ka ri bad ha baroh ki jylla kiba la noh synñiang ha ka jingïasoi. Ha Meghalaya ruh, ngi la lum palat 10 hajar ki jingsoi kyrteng ha kylleng ka jylla bad ka jingsoi kyrteng ka la nang kiew stet ha kaba bun ki kwah ban kular ïa ka jingkyrshan jong ki lyngba kane ka jingïakhih ka ban dang ïai bteng haduh ki bnai ban wan,” ong ka Working President jong ka Congress ka Deborah Marak ha ka jingïakren bad ki lad pathai khubor ha ka sngi Balang.
“Kum ki nongshong shnong kiba don ïa ka jingkitkhlieh, ngi kyntu ïa ki paidbah ban tip shaphang kane ka mat bad ban ïashim bynta ha ki jingïakren kiba tei ban pynthikna ïa ka jinglong ba janai jong ki tnad treikam bad ka rukom synshar paidbah jong ngi. Wat ai ba ka jingsngap jar jong phi kan wanrah ïa ka juk synshar donbor,” ka la bynrap.
Ka Marak ka la ong ba ka Congress ba la ïalam da u Rahul Gandhi ka la ïalap khlem sangeh bad pynmih ïa kawei na ki mat kaba khraw tam kaba buh jingma ïa ka jingsynshar paidbah jong ngi ha kane ka ri.
Kane ka mat ka la pynmih ïa ka jingsngewkhia shaphang ka jinglong kyntang jong ka synshar paidbah ha ka ri India bad ka jingleh hok jong ka rukom jied nongmihkhmat. Ka jingleh thok bad tuh vote kaba la saphriang bha da ka BJP ha kylleng ka ri ryngkat ki sakhi kiba pynrem ha Haryana, Madhya Pradesh, Chhattisgarh, bad Maharashtra.
“Ka don ka jingleh buit tuh ha ka elekshon kaba la saphriang bha, ka BJP bad ka Election Commission ki don bynta ha ka “jingtuh vote” ban ai jingmyntoi ïa ka seng kaba bat ïa u lakam synshar,”, ka la ong.
Da kaba pynpaw ba ki elekshon ki dei ka nongrim jong ka ri synshar paidbah, ka Marak ka la ong, “haba ka nongrim hi ka shah tynjuh da ka jingleh buit tuh ïa ki vote, ka lawei jong uwei pa uwei u nongshong shnong ka don ha ka jingma. Ka jingsngap jar hakhmat ka jingkynnoh synshar donbor bad ka jingtuh vote ha ka elekshon ka pynshlur tang ïa kito kiba wad ban pynduhjait ïa ki tnat synshar paidbah bad ban lute ïa ka mynsiem ieid ri jong ngi.”
