Shillong, Jylliew, 20: Ki bahaing hasem kim pat lap dien satia ïa u Bah Carlus Tron uba la jahrngai naduh ka 11 tarik Jylliew 2025 ha Umran, Ri Bhoi District katba u dang leit pynjhieh harud ka surokbah National Highway-6 ynda poi ha ka shnong Umran hadien ba la wan phai na kaba leit buh ïa ka kurim kaba la armet ha Ganesh Das Hospital, Shillong.
Ha ka jingïakren bad ki lad pathai khubor, u Bah Andreas Tron uba dei u para jong u Bah Carlus Tron u la ïathuh ba ki bahaïing hasem bad wat ka bor shnong ruh ki la dum ka buit ka stad namarba watla shiphew sngi kynthih ba ki la wad hynrei kim shym la lap dien satia haduh kine ki sngi.
U la ïathuh ruh ba kum ka iing ki ladep ban ujor da ka ejahar sha ki Pulit ka Umsning Police Outpost hynrei haduh mynta kim pat ïoh satia ïa kano kano ka khubor na ki Pulit ha kaba ïadei bad ka jingjah jong une u rangbah.
U Bah Andreas u la kyrpad ïa ki bor pulit bad wat ïa ki paidbah, lada ki lap ne ïohi ïa u Bah Carlus Tron kin sngewbha ban pyntip lem sha ki bor Pulit ne sha ki bahaïing hasem.
