Shillong, Lber, 03: Ka jaka pule Polytechnic kaba don ha ka shnong Mawrusyiar ha West Khasi Hills District, kam pat treikam satia mynta la 16 snem wat haba ladep shna hadien ba ladep mang pisa da ka Sorkar Pdeng lyngba ka Ministry of Human Resource Development naduh u snem 2009.
La sakhi ruh ba kane ka jaka pule ka ladep ïeng bad lah ruh ban ong ba kiba bun ki bynta jong ka jingtei la lah ban pyndep hynrei haduh mynta ym pat lah satia ban pyntreikam haduh mynta bad ïa kane ka sakhi ha ka Lah Sngi u Blei ha ka jingleit jurip da ki dkhot jong ka Federation of Khasi Jaiñtia and Garo People West Khasi Hills District.
Ki dkhot ka seng ki la leit ruh ban ïakynduh ïa u Deputy Commisioner jong ka West Khasi Hills District u Bah Garod LSN Dykes ban pan jingpynshai halor ka jingbym pat lah ban pyntreikam ia kane ka shlem pule.
Na ka liang jong ka seng ka la dawa ia ka sorkar Jylla ba kan shimkhia bad ban leh eiei noh mardor halor kane ka shlem pule khnang ba kan long ka jingmyntoi bad ka jingkyrkhu ïa ki samla pule.
