Shillong, K’lyngkot, 13: U MLA barim ka Mawlai Constituency u Bah Process T. Sawkmie u la pynpaw ba ka ladei ka por ban ai da ka Honorarium ne ka jingsiew pisa sha ki Rangbah Rhnong na ka bynta ka jingtrei shitom jong ki ban ïakit ïabah ïa ka lyngkor na ka bynta ka bha ka miat hapoh ki shnong ki thaw.
U Bah Process haba kren ha ka jingïalang ïalap elekshon kaba la long dang shen u la pynpaw ruh ba u la long teng kum u Rangbah Shnong la kumba 12 snem bad ha kito ki por u ïohi ba ka kam Rangbah Shnong kam da long eh kaba khia bad kaba bunkam, kumba ka long mynta. Hynrei ha kine ki sngi ki Rangbah Shnong ki la bun kam haduh katta katta.
U la ong ba lada u jop ïa ka elekshon MDC ka ban sa long, un sa rah ïa kane ka ishu ha ka dorbar jong ka District Council ban ai jingmynjur ïa ka jingtyrwa khnang ba ki Rangbah Shnong kin ïoh da ka jingsiew pisa namar ka jingshakri ka jong ki.
Ki la don ruh katto katne ki riew rangbah na ka shnong Umrynjah, Umphrew, Madan Mawkhar bad na Umpling Umjathang, kiba la wer bad pan ka jingkyrshan na ki paidbah nong Mawlai ba ha kane ka ilekshon MDC ka ban sa long ha ka 21 tarik Rymphang, 2025 ba kin jied ïa u bah Process namarba u dei u briew uba trei khlem sangeh ban shakri ïa ki paidbah.
