Shillong, Ïaïong, 16: U State General Secretary ka BJP Meghalaya State Unit Bah Wankitbok Pohshna ha ka sngi Balang u la kyntait ïa ka jingkynnoh ba ka Sorkar ba la ïalam da ka BJP ha Delhi ka la pyrshang ban khanglad ïa ki Khristan ban mane laitluid hadien ba ki Pulit ka Delhi ki la kyntait ban ai jingbit ïa ki riewngeit ka Balang Catholic kiba thmu ban pynlong ïa ka jingïaid proseshon sla tlai ha Delhi ha ka sngi rakhe ïa ka Palm Sunday ne ka sngi u Trai Sla Trai kum ka jingkynmaw burom ïa ka jingrung donburom u Trai Jisu Khrist ha nongbah Jerusalem ar hajar snem mynshwa hashwa ba un shah ïap halor ka Diengphna.
Ha ka jingïakren bad ki lad pathai khubor, u Bah Pohshna u la ong, “ngan ym lah ban da jubab than ïa kaei kaba jia ha Delhi namarba ka dei ki bor synshar ki ïapher.”
“Hato ka dei beit tang ïa ka Balang Catholic? la kylli u Bah Pohshna bad bynrap, “na kaei kaba ngi pule (ha ki lad pathai khubor) ha ka 12 tarik, Ïaiong, shwa ka sngi u Trai sla tlai ruh wat ïa kawei ka kynhun niam ym shym la ai jingbit ban ïaid proseshon. Ngam tharai ba kan dei kaei kaei kaba ngin hap ban sngew khohñïoh.”
“Ka jingbym ai jingbit da ki bor ka aiñ tang ban ïaid proseshon ym da dei eh ban kheiñ ba ka dei ka jingpynkheiñ ïa ka hok mane laitluid, hynrei ngi long kiba laitluid ban mane katba ngi kwah,” la ong u State General Secretary ka BJP.
U la ong ruh ba ki bor synshar ka Delhi ki la khang tang ban ïaid proseshon sla tlai hynrei kim shym la khang pat ban pynlong ïa ki jinglehniam ha ki iingmane ha ka sngi u Blei kaba dei ka Palm Sunday.
Ka jingbym ailad jong ki bor Pulit ka Delhi ïa ki riewngeit ka Balang Catholic ban ïaid prosehon ha Delhi ka la mih ka jingkynthoh na kiba bun ki liang pyrshah ïa ka Sorkar ba ïalam da ka BJP ha Delhi.
