Shillong, Nohprah, 10: Ka samla Daritngen Podukhei kaba la mynsaw jur na ka jingshah tynrah ha kawei ka kali Maruti ha phyllaw ka skulbah NEHU ha ka janmiet 17 tarik, Naiwieng 2025 ka la ïoh biang ïa ka jingkoit jingkhiah hadien ka jingshah sumar kaba la jlan haduh 24 sngi kynthih ha Nazareth Hospital, Shillong.
Hadien ba ki doktor kiba sumar ki la bishar bha ka jinglong jingman, ki la ai jingbit ba kan leit phai noh sha la iing ha ka 11 tarik Nohprah, 2025.
Ar sngi mynshwa, kata ha ka 8 tarik Nohprah, 2025, ka samla Stephanie Shadap kaba dei ruh ka paralok jong ka samla Daritngen, kaba la mynsaw jur ha ka jingjia aksiden, ma ka ruh ka la ïoh ban leit phai sha la iing hadien ba ka la ïoh ruh ïa ka met kaba koit ba khiah.
Na ka liang jong ka Samla Daritngen bad u kpa jong ka, u Bah Wanda Suchen ki la ai khublei ïa ki doktor jong ka Nazareth Hospital, ïa ka Sorkar bad ïa ki samla pule bad ïa ki nonghikai jong ka skulbah NEHU kiba la don lang ha syndah ha kine ki lai taiew.
Ïa ka samla samla Stephanie la sumar da u Dr. Franky Shadap Siangshai uba dei u Consultant Neurosurgeon katba ïa ka samla Daritngen la sumar da u Dr. Sadem Ahmed, uba dei u Orthopaedician ka Nazareth Hospital.
