Nongstoiñ, Risaw 23 : Hadien ka jingïawad kaba haduh 18 sngi ïa u Bah Lostar Nongphud u ba la jah rngai naduh ka 4 tarik Risaw, 2023, kiba ha ïing ha sem ki la lap ïa ka metïap jong u ha ka sngi U Blei ka 22 tarik u Risaw 2023.
Ïa ka met jong u Bah Lostar la lap ha kawei ka wahduid kaba don ha ka khlaw kaba la tip kum ka Mawthawphan kaba hap hapoh ka shnong Tiniang, West Khasi Hills District.
Ki nongïalam shnong ki la pyntip sha ki pulit ka Nongstoiñ Police Station bad ki pulit ki la wan ban shimti noh ïa ka metïap ban leh ïa kaba donkam.
Kum ban shu pynkynmaw hangne ba u Bah Lostar Nongphud 40 snem ka rta na ka shnong Mawsiangbah u la jah rngai naduh ka 4 tarik Risaw 2023 katba u dang leit wad kseh na khlaw bad une u rangbah u dei ruh uba don ïa ka jingshitom khie ring kaba ju khie man ka por.
