Shillong, Ïaïong 26: Ka jylla Meghalaya ka la ïoh ka khubor kaba sngewtynnad bad pynkmen hadien ba la shem biang ïa u Welcome Rasmut uba na Ummawlong, Jowai, u khynnah 16 snem karta uba la jah noh ha ka step 12 tarik Ïaïong 2025 na Kammanahalli, Bengaluru, Karnataka.
Ïa utei u khynnah la shem biang ha ka 16 tarik Ïaïong na Tamil Nadu da uwei u Pastor bad ki paralok uba la ïarap ban leit buh ïa u hapoh ka jingpeit jong ka Child Welfare Committee (CWC) Krishnagiri, Tamilnadu, bad ïa une u heprit Welcome Rasmut la aiti noh sha ki bahaïing jong u ha Bengaluru ha ka 25 tarik Ïaïong 2025.
Ka jingjah noh jong u Welcome Rasmut ka la pynlong ïa ki bahaïing ha sem bad ki paralok jong u ban syier mynsiem bad sah ha ka jinglyngngoh. Ïa u tei u khynnah la ïohi khatduh ha ka step 12 tarik u ïaïong 2025 hadien ba u la mih na ïingsah jong u ban leit mareh step bad la suba ba u la bakla lynti. Ka jingbym lah ban ïoh jingtip halor jingjah jong u, ka la pynlong ïa ki bahaïing hasem ban phah khubor sha ki pulit bad na ka liang ka seng KSU Bangalaru Unit ka la phah ki khubor sha ki local newspaper bad ha ki social media page.
Lyngba ka jingïatreilang kaba janai jong shibun ki seng bad ki riewshimet, la ïoh khubor ba u khynnah u la poi sha Tamil Nadu. Uwei u pastor uba shem ïa u, u la shimkhia bad u la pynpoi ïa u sha ka ka jaka ai jingsumar ïa ki khynnah ka Children Welfare Committee Krishnagiri Tamilnadu, kaba la peit bad sumar bha ïa u haduh ba la ïohpdiang noh da ki bahaïing jong u.
Ka jingjop ban ïoh biang ïa u Welcome Rasmut ka long ruh ka sakhi jong ka jingtrei shitom bad jingïatreilang kaba janai jong ki briew kiba ieit ïa ki para mynsiem bad kiba don ka jingkitkhlieh. Kine ki kynthup ïa Sir Ïada Martin Marbaniang, Pastor A.S. Nongrum jong ka KJCF Bangalore, ki paralok ba ïasah marjan, ka NPP Ummawlong Youth Wing, ka CWC Jowai, ki pulit na Banaswadi Police Station, ryngkat ki bahaïing ha sem, kiba la shim khia ban pynsaphriang ïa ka khubor wad jingtip bad ban wad jingïarap.
Ka jingai jingkyrshan na kine ki kynhun bad riew paidbah ka la pyni ba ka jingïatylli bad ka jingïarap para briew ka long kaba donkam tam ha ka synshar paidbah bad ha ka jingïada ïa ki khynnah.
Ki bahaïing jong u Welcome Rasmut ki ai ka jingsngewnguh kaba khraw sha baroh kiba la noh synñiang, kiba la kynmaw lem ha ki jingduwai bad kiba la kyrshan lem ha kum kane ka por ba ki ïakynduh ïa ki jingeh, ong ka kyrwoh ba la phah da u Bah Donboklang Nongphud President KSU Bengaluru Unit.
