Shillong, K’lyngkot, 23: Ki nongrep synsar na ka hnong Mynriang, ka shnong kaba dang hap hapoh ka East Khasi Hills District lyngba u kyrwoh ba la phah u Bah Bah Jylliew Jingmut Lyngkhoi, ki la kyntu bad kyrpad ïa ka Sorkar Jylla ba kan phai khmat lem ïa ki nongrep synsar namar ha kine saw snem ba la leit noh ka dor jong u synsar ka la hiar shaba palat ha kaba ki nongrep ki lah ban die tang T. 30 haduh T. 40.
Kum ban shu pyntip hangne ba ka Sorkar Jylla lyngba ka tnat ka Rep ka Riang ka la ai jingithuh ïa u synsar u mar rep ha ka 14 tarik, Jylliew, 2019 lane u Agro Forest Plantation Tree bad ka Sorkar ka ladep pynmih ruh ïa ka Notification lane ka Jingpynbna ban ithuh noh ïa u synsar kum u mar rep bad ban pyllait ruh na ka jingshah oh khajna na ka tnat khlaw bad na ka Autonomous District Council.
“Kane ka la pynkmen ïa ngi ki paid nongrep synsar jong ka jylla baroh ka wei. Hynrei tang ar snem ba la pynbna paitbah da ka Sorkar Jylla ban ithuh noh kum u synsar kum u mar rep ka dor ka la hap noh jraiñ ha kaba ngim lah shuh ban khie khlieh kum ki nongrep synsar ha kine ki snem. Bun na ki nongrep ki la duhnong shaba palat kat haduh ba ki nongrep jong ngi ki la salia ban kheit ïa u synsar,” la ong u Bah Lyngkhoi.
“Ki (nongrep) hap ban buria na ka pla bad na ka met la jong ïa ka bai trei namarba ka dor jong u synsar ka tad palat. Ka Sorkar Jylla ka dei ba phai khmat lem ïa ngi ki nongrep kumba ka ju ong ba ki nongrep ki dei ki budlum jong ka ïoh ka kot jong ka Jylla,” u la ong bad kynthoh, “lada ngi phai kum ki nongrep kumba ju ong kat nang rep nang syrdep.”
“Sa shisien shiwat ngi kum ki nongrep synsar ngi da kyntu jur ïa ka Sorkar Jylla ba kan sngap lem ïa ngi ban ïakren lem ïa ka iew ka hat mynta u snem ba ma ngi ki nongrep synsar ngin lah ban khie khieh ym ban buria na lade ïa ka bai trei bad ban phumut phumat kumjuh ruh ban kyntiew ïa ka ïoh ka kot jong ngi ki nongrep synsar,” la kyntu u Bah Lyngkhoi uba long ruh u nongrep synshar ha ka shnong Mynriang.
“Ngi kyntu ïa ka Sorkar Jylla kumba phi la ithuh ïa u synsar kum u mar rep sngewbha ban shimkhia bad ban wanrah ïa ka iew ka hat ba kham biang ym ban ngin shah khñiot dor,” la pynkut u kyrwoh.
