Shillong, Rymphang, 19: Ka jingpynkhreh ia ka elekshon jong ka Khasi Hills Autonomous District Council (KHADC) na ka bynta ki 17 tylli ki Constituency ha East Khasi Hills ka la iaid shaid shaid.
U Additional Deputy Commissioner jong ka East Khasi Hills District Ronnie Wahlang ha ka jingiakren bad u nongthoh khubor ha ka sngi Balang, u la iathuh ba 13 tylli ki Constituency la leh na ISBT, Mawiongrim, mar ar tylli la leh na Sohra Civil Sub-divison bad na Pynursla Civil Sub-division.
“Ka jingpynkhreh ka long kaba janai na ka liang jong ngi ban pynbiang nadong shadong na ka bynta ki nongtrei kiba hap leit sha ka kamram elekshon sha ki Polling Station bapher bapher,” la ong u Bah Wahlang.
U la iathuh ba ki nongtrei kiba leit sha ki kamram elekshon ki dei kiba la ioh ia ki jingshah hikai pyntbit ban pyndep ia ka kamram ba ka Sorkar ka la bynshet na ka bynta ban pyniaid ia ka elekshon na ka bynta ka Mawsynram, Mawkynrew bad Nongkrem Constituency ki la mih ha ka sngi Balang.
U la iathuh ba ki nongtrei ba la bynshet ban pyniaid ia ka elekshon ha ki 720 tylli ki Polling Station kin sa mih lashai ka sngi Palei.
U la pyntip ruh ba la pynbiang ia ka Postal Ballot Cell ha kaba ki nongtrei sorkar kiba dei ban leit sha ki Polling Station ki la pyndep lypa ia ka jingthep vote ban jied ia ki nongthawaiñ sha ka KHADC.
Ha kajuh ka por u la pyntip ba la pynbiang ruh ia ka Medical Cell ban ai jingsumar ia ki nongtrei lada ki don kano kano ka jingshitom ha ka bormet bad shwa ba kin leit sha ki Polling Station.
U la iathuh ba ladep ban pynbiang ia ki kali ki ban leit on ia ki nongtrei kiba leit sha ki Polling Station bad ban leit buh ruh sha ki shnong ba ki shong ki sah ynda ki la leit buh ia ki EVM Machine ha ka Strong Room khnang ba kan ym don kano kano ka jingthud ha ka leit ka wan jong ki.
Halor ka jingpyntreikam ia ka Model Code of Conduct (MCC) ba la pyntreikam naduh ka 27 tarik, Kyllalyngkot, 2025 ka ban sa kut ha ka 24 tarik Rymphang, 2025 kam shym la don kano kano ka jingpynkheiñ. “Ngi pynpaw ia ka jingsngewnguh ia ka DC kum ki Returning Officer bad ki Assistant Returning Officer kiba peit ia ki 13 tylli ki Constituency hapoh ka East Khasi Hills bad kumjuh ruh ia ki seng saiñpyrthei halor ka jingiaid beit iaid ryntih bad kam shym la don kano kano ka jingpynkheiñ ia ka Model Code of Conduct,” la bynrap shuh shuh u Bah Wahlang.
