Shillong, ïaïong, 14: Kan long ka sngi kaba kmen tam ïa ki nongshong shnong jong ki phra tylli ki shnong hapoh ka thain Nongtraw kiba hap hapoh ka Bhoirymbong C&RD Block, ha kaba u MLA jong ka Umroi Constituency u Bah Damanbait Lamare u la plie paidbah ïa ka Health and Wellness Centre kaba don ha ka shnong Nongtraw.
Kane ka Health and Wellness Centre ba la shna ha ka shnong Nongtraw la khmihlynti ba kan ai jingshari ïa ki phra tylli ki shnong kiba kynthup ïa ka Umsarang, ka Nongtraw Bangla, ka Lumdiengngan, ka Lumrit, ka Kyrdeng, ka Wah Myntait, bad ka Mawkduk.
Ïa kane ka jaka ai jingsumar la tei ha ka jinglut kaba kot T. 5.5 lak bad ïa ka projek la pyntrei bad khmih da ka Village Employment Council jong ka shnong Nongtraw.
Ha ka jingplie ïa kane ka jaka ai jingsumar la sakhi lang da ka District Medical & Health Officer (DMHO) jong ka Ri Bhoi ka Dr. A. Kharduid, u Rangbah Shnong ka Nongtraw u Bah Robert Dympep, ki ophisar na ka tnat ka Koit ka Khiah bad ki paidbah nongshong shnong.
