Shillong, Lber 30: Kan long ka sngi sah jingkynmaw shi junom ïa ka histori jong ki paidriewngeit ka Jylla Niambah Shillong ha ka sngi U Blei kiba la sakhi ïa ka jingkyntang ïa u Fr. Rev. Bernard Laloo kum u Auxiliary Bishop jong ka Jylla Niambah Shillong kaba la long ha madan Calvary, Cathedral of Mary Help of Christian, Laitumkhrah, Shillong.
Ha ka jingpynkyntang Auxiliary Bishop ïa u Fr. Bernard Laloo la sakhi lang da u Apostolic Nuncio jong ka Vatican sha ri India bad sha Nepal u Most Rev. Leopoldo Girelli ryngkat ka jingdon lang jong ki Bishop, ki Archbishop na ki Jyllaniam ka thaiñ Shatei Lammihngi, ki Phadar, ki riewniam bad ki hajar ngut ki paidriewngeit jong ka Balang Katholik.
Ïa ka jinglehniam la pynbynta da u Archbishop jong ka Jylla Niambah Shillong u Most Rev. Victor Lyngdoh, ha kaba la sakhi lang da ki bahaïing hasem jong u Fr. Bernard Laloo, u Myntri Rangbah ka Jylla Conrad K.Sangma, u Symbud Myntri Rangbah Bah Prestone Tynsong, ki Myntri ka Sorkar Jylla, ki MLA bad ki MDC bad kiwei kiwei kiba la shah khot sngewbha.
Ynda ladep ka liturji na ka jingpule jong ka Jingthoh Bakhuid, la khot la jer ïa u Fr. Bernard ban pynithuh ïa lade, bud sa ka jingkhot kyrpad ha u Mynsiem Bakhuid bad hadien kata la pynbud pat sa ka jingpule ïa ka shithi ba la thung Auxiliary Bishop ïa u Fr. Bernard ba la phah da u Pope Francis bad la pule ïa ka shithi ha ka ktien Latin da u Most Rev. Leopoldo Girelli bad ha ka ktien Khasi la pule da u Vicar General jong ka Jylla Niambah Shillong u Rev. Fr. Richard M. Majaw.
Haba ai ïa ka sneng ka kraw da kaba pynshong nongrim na ka Jingthoh Bakhuid kaba la sot na ka Gospel u Lukas 15:3, 11-32, shwa ban pynkyntang ïa u Fr. Bernard Laloo sha ka kyrdan Bishop, u Most Rev.Victor u la ong, ‘ngi dei ban long kum u kpa jong u khun sarong awria, uba kloi ban pdiang ban map bad ban ieid ïa kiba la leh bakla ne leh pop ha ka jingim jong ki.’
Da kaba pynshai shuh shuh ïa ka jingpule ba nyngkong na ka Kitab u Joshua 5:9a-12 bad na ka Shithi Baar jong u Paulus Bakhuid sha ki Khristan ha Korinth 5:17-21, u Archbishop u la ong shuh shuh, “ngi dei ban pynïasuk ïalade shimet shimet bad u Blei da kaba kylla bamut.”
Haba kyntu ïa u Bishop bathymmai u Archbishop u la ong ‘ko Bishop Bernard to long kum u kpa jong kato ka pharshi ba ngi dang shu dep pule ha ka Gospel, to long uba kloi ban long kpa ïa ki khun jong ka Balang.”
Ynda la dep ka sneng ka kraw, ka riti lehniam pynkyntang Bishop ka sdang da ka jingkylli-tohkit ïa u Fr. Bernard bad la pynbud pat sa ka jingduwai da ka sur jingrwai ba pan ïa ka jingïasaid jong ki riewkhuid bad hadien kane ki Bishop bad ki Archbishop ki buh ïa la ki kti halor u Fr. Bernard ban duwai kyrpad ïa u Blei na bynta jong u.
Hadien kane pat u Most Rev. Victor Lyngdoh u la pynbud sa ka jingduwai pynkyntang da kaba pan bor na u Mynsiem Bakhuid bad ka jinghiar pateng ha ka Balang la kyntang Bishop ïa u Fr. Bernard Laloo da kaba pynsleh da ka umphniang Krisma.
La aiti ha u Bishop bathymmai ïa ka Gospel kum ka jingkitkhlieh jong u ban ïalap ïa ka Ktien U Blei bad ban hikai ïa ki paidriewngeit, ka sati, ka tupia, u diengduh nar bad u Diengphna.
La pynkut ïa kane ka sngi da ka jingleh burom ïa u Bishop Bernard Laloo bad kumjuh ruh ka jingpynkup burom ïa u Apostolic Nuncio, ïa ki Bishop bad ki Archbishop kynthup ruh ïa u Myntri Rangbah bad u ïa u Symbud Myntri Rangbah ka jylla.
