Shillong, Rymphang, 21: Ki Pulit ha ka sngi Thohdieng ki la register case bad sdang ban pynlong ïa ka jingtohkit ban ïohkem ïa ki briew kiba donkti ha ki ar tylli ki jingthombor bad ban pynpait ïa ki Electronic Voting Machine (EVM) ha ki saw tylli ki Polling Station kiba hap hapoh ki ar tylli ki Constituency ha East Jaiñtia Hills district.
Kine ki jingjia ki la pynlong ïa ka tnat District Council Affairs (DCA) ban pynlong biang ïa ka jingthep vote ha ki saw tylli ki polling station- Wapung Skur A bad Wapung Skur B kiba hap hapoh ka Musniang-Rangad Constituency bad ka Bataw A bad Bataw B kiba hap hapoh ka Bataw-Lakadong constituency.
“Ngi ladep register case bad ka jingtohkit ka la ïaid shakhmat,” ong u Superintendent of Police ka East Jaiñtia Hills u Giri Prasad.
U la ong ba haduh mynta ki Pulit kim pat kem satia ïano ïano ruh.
Tang shu ïoh jingtip halor kine ki jingjia, mar mar u Director General (Eastern Range) Davis N.R Marak, u Deputy Commissioner u S. Awasthi bad u SP u Giri Prasad ki hiar sha ka shnong Wapung ban pynlong ïa ka jingtohkit halor kane ka jingjia.
Ka Additional Deputy Commissioner (ADC) jong ka East Jaiñtia Hills ka Kong Jacquiline U Kharpuri kaba long ruh ka Returning Officer haba kren sha ki lad pathai khubor ka la ïathuh shwa kane ka la don ka jingïania bad la lah ban pynïasuk bad ka jingthep vote ka la ïaid beit hynrei tad haduh ka por 11.20 baje mynstep hynrei dei ha ka por kumba 11.35 baje mynstep la ïoh jingtip ba ki don ki briew ki bym lah ban ithuh durkhmat kiba la rung jubor bad ha Wapung Skur A polling station bad pynpra lut ïa ki tiar ki tar bad pynpait ruh ïa ka EVM. Nangta, pat sa ha ka por 11.37 baje mynsep, la pyntip ba kajuh ka kynhun ka la leit sa sha Wapung Skur B polling station bad pynpra ïa ka EVM. Kane ka jingjia ka la pynlong ïa ki bor synshar district ban pynsangeh noh mardor ïa ka jingthep vote ha kine ki ar tylli ki polling station.
“Ym don iwei ruh napdeng ki nongtrei kiba pynïaid ïa ka jingthep vote ki ban ithuh durkhmt ïa ki briew kiba thombor bad kumba ki ïoh jingtip ki dei ki briew kiba sah shabar na ka shnong lane ki lah ban dei kiba wan na kiwei kiwei ki jaka,” ka la ong.
U SP Giri Prasad u la pyntip ba ïa ki bor Pulit yn sa pynkhlaiñ bha ha kine ki ar tylli ki polling station ban pynthikna ba kan ym don shuh kano kano ka jingjia.
Shuh shuh u la ïathuh ba ym shym la don mano mano ruh ba mynsaw ha kine ki jingjia. “Ngi la register case bad ka jingtohkit ka dang ïaid shakhmat ban ïohkem ïa kiba donkti ha kane ka jingjia.” la ïathuh u SP.
