Khliehriat, Nailar, 25: Ki Pulit jong ka East Jaiñtia Hills District, ha ka sngi Thohdieng ki la registar case pyrshah ïa ki briew kiba donkti ban kynshoit ïa ki bor Pulit katba ki dang tem ïa ki paidbhur kiba la pynthud ïa ka jingpynsngew paidbah kaba la long ha ka sngi palei ha Thangksai.
U Superintendent of Police ka East Jaiñtia Hills, u Jagpal Singh Dhanoa, ha u kyrwoh ba la phah sha ki lad pathai khubor, u la ong, “ha ka 24 tarik ha ka por ba la pynlong ïa ka jingpynsngew paidbah hapoh ka jaka jong ka M/s Meghalaya Cements Limited, Thangskai ka la mih ruh ka jingïapynibor hapdeng ki Pulit bad ki paidbah, hynrei ka Video kaba pyni halor kane ka jingjia ka la mih paw lyngba ka Youtube, jong ka Batesi Tv, ha kaba la ïohi ïa ki katto katne ngut ki briew kiba pyrta da ki kyntien kynshoit.”
Ki Pulit ki register case hapoh Lumshnong Police Station hapoh ka kyndon 153B/503/504/506 Indian Penal Code (IPC) bad ka jingtohkit halor kane ka la ïaid shakhmat.
U SP u la pynpaw ruh lyngba u kyrwoh ba ka tnat Pulit jong ka jylla ka khmih na ka bynta ban pynneh pynsah ïa ka jingsuk hapdeng ki jaidbynriew bad kano kano ka jingpyrshang ban kynshoit bad pynshit yn pynngat ha ki kyndon jong ka aiñ.
