Shillong, Jylliew, 09: U Myntri ka tnat Jngohkai Pyrthei ka Sorkar Jylla u Bah Paul Lyngdoh ha ka Lah Sngi u Blei u la ïathuh ba ka tnat Pulit ka ladep ban register ïa ka ejahar ba la mudui pyrshah ïa ki lad pathai khubor na rithor bad ïa ki briew kiba kynthoh da kaba pynbudnam sniew ïa ka jylla Meghalaya halor ka jingïap jong u Raja Raghuvanshi ha ka shnong Sohra.
Ha ka jingïakren bad ki lad pathai khubor u Bah Paul u la ong, “ka ejahar ba la register ka dei pyrshah ïa ka lad pathai khubor Times of India kaba la kynnoh ïa ka Meghalaya kum ka Crime Prone Hills nangta ki don ki Youtubers. Ka Times of India kan hap ban ap jubab hapoh ka Iingbishar kum kiei kita ki kam runar ruser kiba la ju jia ha ka thaiñ Sohra.”
Haba kylli, u Bah Paul u la ong, “naduh kaba sdang kane ka jingjia, ka la don ka jingbishar ïa ki lad pathai khubor kiba la pynbudnam ïa ka jylla jong ngi bad ban pynshit ïa ki paidbah ban leh pyrshah ban ktah kti ïa ki nong Meghalaya.”
“Da ka jinglah jong ngi ban pynpaw pyrthei ïa ka jingjia, ka paw mynta ba ka dei ka jingpynïap ba la shu ai wai ban pynïap bad ka nongleh kam bymman ka Sonam ka la leit aiti dalade ban pyndem hakhmat ki Pulit ka Nanganj Police Station, Ghazipur district, Uttar Pradesh ha ka 9 tarik mynta u bnai,” ula ong.
“Ha ka jingtohkit ïa kiba la shah kem, ka Sonam ka dei kaba donkti lut nadong shadong ban pynïap ïa u tnga jong ka bad ba ka don ka jingïakren borabor bad kiba la leh ïa ka kam bymman,” ula bynrap.
Haba kylli hato kane ka jingjia kan ktah neem ïa ki kam jngohkai pyrthei ha ka Jylla, u Bah Paul u la jubab, “kaba lyngngoh ka long ba ki nongleit nongwan ki la nang bun shuh shuh. Lada phi leit mynta lei lei sha Sohra ki (nongjngohkai pyrthei) la nang kham bun shuh shuh bad mynta ka sngi leilei ynda la mih kane ka khubor ngi khmihlynti ba ka jingwan jong ki nongjngohkai pyrthei kan nang kiew.”
Ha kaba ïadei bad ka jingshah pynïap jong u Raja Raghuvanshi, u Myntri u la ong, “ha kane ka jingjia, kam dei ba ka Meghalaya ka la jah burom, hynrei ka paw mynta ba ka jylla jong ngi ka la pynshai kdar shabar ba ka Meghalaya ka long kaba shngaiñ, ka long paralok bad ki nongjngohkai pyrthei hynrei lada ki nongjngohkai pyrthei ki kylla ki nongleh kam bymman kumno ngin ïada ïa kata.”
U la ong ruh ba ka jylla mynta ka la ïoh ban pynhiar mynsiem da ka jinglah jong ka Special Investigation Team (SIT) ban lap ha ka jingtohkit halor ka jingkhladnoh jong u Raja Raghuvanshi.
“Ngi don ka jingshaniah ha ka tnat Pulit ka jylla ban lap ïa ka met jong u Raja da ka jingïarap lem ki nongshong shnong, ki kynhun bapher bapher, SDRF, NDRF, Dorbar Shnong Sohra, ki bor synshar district,” u la ong.
U SP ka East Khasi Hills Bah Vivek Syiem haba bynrap u la ïathuh ba katkum ka kaiphod Post Mortem ka pynpaw ba ki don ar tylli ki dak ba la pom da ka wait na ka khlieh jong u Raja Raghuvanshi bad ïa ka wait la thied na Guwahati. Ha kawei pat ka liang, u Bah Paul u la bynrap, “ngi la ïaid shakhmat ruh ban thung ïa ki Tourist Buddies bad ha ka Phase-I ngin thung shwa 50 ngut bad kiba bun na kine kin long shwa ha ki jaka ba ki nongjngohkai pyrthei ka kham jur kum ha Sohra, Shillong, Dawki, Umïam.”
 | ReplyForwardAdd reaction |
