Shillong, Jymmang, 15: Khatwei ngut ki briew ba kynthup ïa ki dkhot ka Village Defence Party (VDP) bad u Rangbah Shnong ka Pynter, East Khasi Hills District kiba la shah kynnoh ba ki donkti ban bom ban tied ïa u Bah Trophimos Khongmawloh haduh ba un da khladnoh ki la pan jamin lypa na ka Kashari.
U Superintendent of Police ka East Khasi Hills u Bah Vivek Syiem ha ka jingïakren bad ki lad pathai khubor ha ka sngi Thohdieng, u la ong, “ka jingjia ka la jia ha ka 7 tarik, Ïaiong, 2026 bad katkum ka ejahar ba la ïoh pdiang na u kpa u Bah Netrebiweit Khongsdoh u la kynnoh ha ka ejahar ba la shoh la dat ïa u khun jong u bad na ka jingshah shoh u la khlad. Ngi la ïoh pdiang ïa ka ejahar hadien shi bnai.”
U la ïathuh ruh ba u kpa u la mudui ïa ka ejahar na ka video kaba u kpa u la ïohi.
U SP ula ong ba ïa kane ka jingjia ym shym la pyntip sha ka Police Station la ka long na u Rangbah Shnong bad na ka VDP. “Ïa kane ka ejahar ngi la register kum ka Murder Case hapoh ka Section 103/238/127 BNS,” la pyntip u SP.
“Ngi la pan bor na ka Kashari ban khlong ïa ka met bad ka Kashari ka la pynmih ïa ka hukum bad mynta ngi dang ap mynta sa ka jingbuh sngi jong u SDO ka Pynursla Civil Subdivision,” la ïathuh shuh shuh u SP.
“Ynda la khlong biang ïa ka met bad pyndep ïa ka Post Mortem ha ka jaka tep ngin sa lah ban shim rai ban ïakhun pyrshah ïa ka jingïoh jamin lypa jong ki (11 ngut),” ong u SP.
Ka jingtohkit kan long pyrshah ïa u Rangbah Shnong ka shnong Pynter u Bah Fullmoon Khongsdoh, ïa ki dkhot ka Village Defence Party (VDP) bad kumjuh ruh ïa ka Kong Dhena Khongmawloh ka kmie jong u Bah Trophimos Khongmawloh la ka don bynta lang neem ha kane ka kam ban aiti (ïa u khun) sha ki VDP,” la ong u Bah Syiem.
U SP u la ïathuh ba ka tnat Pulit mynta ka la sospon ïa ka Village Defence Party (VDP) hapoh ka shnong Pynter.
Haba kylli, u la ong, “ki VDP ki dei ki nongïada bad ki ïatreilang bad ki Pulit. Ha kane ka kynti, ki la ïaid lait na kata. Halor kane ka jingjia, ngin tohkit la ka jingïap ka dei neem na ka jingshah tied shah bom ha ki bad shah pynïap ha ki. Kata kan shong ka jingtohkit. Ka jingbthah ïa ki VDP na ka por sha ka por ka long ba kin dei ki pulit jong ka shnong ban tehlakam ïa ki jingsniew hynrei ym ban shim ïa ka aiñ ha ka kti lajong bad kano kano ka jingjia hapoh ka shnong mar mar ki dei ban pyntip ïa ki Pulit hynrei ha kane ka kynti kam shym long kumba la bthah.”
“Ka aiñ kan ïada beit ïa uno uno u briew uba pyntip ne uba ai kano kano ka sakhi bad ai khubor sha ki Pulit,” ong u SP.
