Vatican, ïaïong, 22: Ïa ka met ba dang sah jong u Pope Francis la tep donburom ha ka ingmane ba u ieit eh ha Rome hadien ba la pyndep ïa ka jinglehniam bakhatduh da ka Mass Bakhuid ha St Peter’s Square, Vatican ha ka sngi Saitjaiñ.
Ïa ka met jong u Pope Francis, uba la khladnoh ha ka Lah Sngi U Blei mynta ka taiew ha ka rta kaba 88 snem, la leh donburom khaduh na ka bynta 30 minit kaba la sdang ha ka por 1:00 mynsngi ha Ïingmanebah Santa Maria Maggiore, kaba don ha nongbah jong ka ri Italy kaba la tei ha ka spah snem kaba san.
Na ki video ba la sam da ka Holy See la pyni ba ki Cardinal ki la shon muhor ïa ka synduk ba la thep ïa ka met jong u Pope Francis.
U Cardinal Kevin Farrell, uba long kum u Camerlengo ban pynïaid ïa ki kam jong ka Vatican tad haduh ban da jied ïa u Pope ba thymmai u la synreit da ka um khuid um kyntang hadien ba la pynhiar ïa ka synduk hapoh ka jingtep bad ïa u Diengphna ba u Pope Francis ba u ju deng mynba u dang im la buh lang ha ka synduk.
Shwa ban khlad na kane ka sla pyrthei, u Pope Francis u la kyrpad ba ka jingtep kaba don hajan ka dukan jong u Saint Francis, ka dei ban long kaba malu mala bad ka bym da donkam ban pynriam than, khnang ban pynpaw ïa ka mynsiem jinglong rit jong u ha ka jingsynshar jong kum u nongsharai mynsiem ba hakhliehduh jong ka Balang Catholic.
Ïa u mawjingtep la thoh da ka kyntien “Franciscus” kaba dei hi ka kyrteng jong u Pope ha ka ktien Latin. Ïa u maw marbul la wanrah na Liguria, ka bynta ba shatei sepngi jong ka ka ri Italy kaba la long teng ka iing shong jong ki kpa tymmen jong u Pope shwa ban kynriah sha ka ri Argentina.
U Pope Francis uba don ka jingieit barhem ïa ka Maria Theisotti bad u ju leit duwai manla ka por ha ka Ingmanebah Santa Maria Maggiore ynda la wan phai nabar ri sha Rome.
Ïa ka jingkwah jong u ban tep ha ka Ïingmanebah Santa Maria Maggiore ula pynpaw ha u snem 2023. Ha kane ka ingmanebah Santa Maria Maggiore, kaba don ha dohnud jong ka nongbah Rome, la ju tep ruh haduh hynñiew ngut ki Pope kiba rim.
Hynrei u Pope uba khatduh eh ban tep ha kane ka Ïingmanebah u dei u Pope Clement IX ha u snem 1669. Kumba ju long, ïa ki Pope ba la khladnoh la ju tep beit ha Ïingmanebah St Peter’s ha Vatican.
