Shillong, Risaw 26: U Vice Chancellor jong ka skulbah North Eastern Hill University (NEHU) u Prof. PS Shukla u la pynksan ba ka jingthungkam ia u Rohit Prasad kum u Technical Advisor ha ka ophis treikam jong u Vice Chancellor ka dei ka rai ba la shim da ka Executive Council.
U Prof. Shukla u la pynpaw ia kane hakhmat ki samla pule jong ka NEHU ha ki kynta ba ka synjuk ki samla pule ka North Eastern Hill University Students Union (NEHUSU) ki la kthong ia u Prof. PS Shukla shaduh ka Old Guest House hadien ba kim shym la iohlad ban iakynduh ia u hapoh ka kamra treikam ka jong u, ha ka khyllipmat ba ki la leit ban kerkut ia ka ophis treikam jong u na ka bynta ban ioh pynpaw ia ki mat jingdawa ki jong ki.
Shwa kane, tang shu ioh jingtip ba u Vice Chancellor u don ha ka jingialang jong ka North East Philosophy Teachers Meet, 2023 kaba la long ha Seminar Hall, U Kiang Nangbah Guest House (Old Guest House) NEHU, Shillong Campus, ki samla pule ki la rung jubor shapoh ban pynthud ia ka jingialang.
Lehse kane kan dei ka sien ka banyngkong eh ba ki samla pule jong kane ka skulbah kin pynthud ia ka jingialang hapoh ka Campus ba la iashim bynta da u Myntri ka tnat Pule Puthi jong ka Sorkar Jylla u Rakkam A. Sangma.
Da ka jingkyrpad jong u Rakkam A. Sangma, ki samla pule ki la ap ia u Vice Chancellor shabar ka Guest House tad haduh ban da wai ka jingialang. Katba ki dang ap ia u Vice Chancellor ban mih na ka jingialang ki samla pule ki la pyrta da ki sur pynrem ia u Vice Chancellor bad dawa ruh ban pynurlong ia ki mat jingdawa.
Ka NEHUSU ka la byrngem ban pynlong biang da ka jingiakhih lada u Vice Chancellor um wengkam mardor ia u Rohit Prasad hapoh ka 12 baje mynmiet jong ka sngi Thohdieng bad lada um pynurlong ia ki jingdawa na ka bynta ka bha ka miat jong ki samla pule jong ka NEHU.
Da ka jingpan jubab, u Prof. Shukla u la pyntip hakhmat ki samla pule ba ia u Rohit Prasad la thungkam Contractual katkum ki Rule bad Regulation jong ka skulbah NEHU bad nalor kata u la iathuh ba la pyntip ia kane sha baroh ki nonghikai bad ki nongtrei jong ka NEHU.
“Lada phi kwah ia ka kopi (thungkam) ngan ai ia phi,” ong u Prof. Shukla sha ki samla pule bad bynrap, “kane kam dei ka rai ba la shim da u Vice Chancellor shimet, hynrei kane ka dei ka rai ba la shim da ka Executive Council.”
Shuh shuh u la pynksan ruh ba la thung ia u Rohit Prasad ban shna ia ka NEHU App na ka bynta ka jingmyntoi jong ki samla pule. U la iathuh ruh ba u Prasad u don da ka IT Team kaba iatreilang ruh bad ki samla pule kumno ban shna ia ka App.
