Shillong, Jymmang, 13: Ka Jaiñtia Students’ Union (Central Body) ka la dawa ba lada jia ba la pynbna ïa ka Tura kum ka Winter Capital jong ka Jylla Meghalaya, kumta ka Jowai ka dei ban ïoh ïa ka Summer Capital. Ka Jylla Meghalaya ka dei kaba don lai tylli ki jaidbynriew trai ri trai muluk kiba kongsan kata ki Jaiñtia, ki Khasi, bad ki Garo. Kumta baroh ki dei ban ïoh mar ïaryngkat ban pynneh ïa ka jinglong hok bad jingïatylli ha ka jylla.
Ka Union ka pynpaw ïa ka jingshisha ba ka thaiñ rilum Jaiñtia ka dang ïai sah ha ka jingduna bad ka dang ïai bteng ban ïakynduh ïa ki jingeh kiba khraw ha ka liang ki jingtei. Ha kaba ïadei bad kane, ka jingai kyrdan ïa ka Jowai kum ka nongbah lyiur kan kyntiew ym tang ïa ka roi ka par kaba ïahap kyrdan hynrei kan pynthikna ruh ïa ka jingïaryngkat hapdeng ki jaidbynriew, ong u kyrwoh ba la phah da u General Secretary ka JSU Bah Neilkee Mukhim.
Ka JSU ka la maham ruh ba kano kano ka jingleh jong ka Sorkar Jylla ban ai ïa ka kyrdan nongbah katkum ka aiom ïa kawei ka thaiñ katba ka kyntait ïa ka Jaiñtia Hills kan wanrah ïa ka jingbym sngewhun na baroh ki liang. Lada kum kane ka jingbym ïahap kan dang ïai bteng, ka Jaiñtia Students’ Union, ryngkat bad ki paidbah jong ka thaiñ, kin hap ban pynlong ïa ki jingïakhih katkum ka riti synshar paidbah ban dawa ïa ka bhah kaba dei hok jong ki.
Ka Union sa shisien ka ïaiban lada jia ba ka mih ka jingbym ïahap, ka ka KSU bad ki paidbah ka thaiñ kin ym shong sngap jar hynrei ïaleh tyngeh ban ïoh ïa ka bhah kaba dei hok jong ki da kaba dawa ban seng ïa la ka jong ka nongbah ha ka jylla, la bynrap suh shuh u kyrwoh.
