Shillong, Naitung, 31: Ka Ïingbishar Meghalaya High Court ka la ong ba ki nongshah mudui ki lah ban ai jingmut ïa ki bor synshar district ban shim ïa ki lad ki lynti khnang ban pynthikna ba ka Yatra, kaba la buh sngi ban pynlong ha ka 2 tarik, Nailar, kan ïaid beit khlem kano kano ka jingjia.
Ka Bench ba la khlieh da u Justice HS Thangkhiew ka la kdew ba kam don jingthmu ban pynmih shuh ïa kino kino ki hukum kiba lah ban tyllep noh ïa ki hukum ba la pynmih kham mynshwa da ka ïingbishar.
“Namarba ïa ka Yatra, la pyntip ba la pynbeit ha ka 2 tarik, Nailar 2025, kane ka Ïingbishar kam kwah ban pynmih shuh ïa kino kino ki hukum kiba lah ban tyllep noh ïa ki hukum kiba kham mynshuwa kiba la pynmih da kane ka Ïingbishar. Hynrei lada ki nongshah mudui ki kwah na ka bynta ka jingshngaiñ, ba ka jingïaid lynti kan long khlem kano kano ka jingjia, ki lah ban ai jingmut sha ki bor synshar district na ka bynta ban pynneh pynsah ïa ka suk ka saiñ da kaba shim shuh shuh ïa ki lad jingïada kiba biang,” la ong ka ïingbishar ha ka hukum kaba la pynmih ha ka sngi Palei.
La pyntip ruh sha ka Ïingbishar ba ka la don ka jingpyrshah na ka shnong ba la tip kyrteng kum ka Lyniong kaba ïadei bad kane.
La bthah ïa u nongïasaid aiñ jong u nongmudui ban ai jingmut hakhmat ka Deputy Commissioner ba kan pynmih ïa ki hukum kiba biang.
Ïa ka kam la buh sngi ban shong bishar biang ha ka 5 tarik, Nailar, 2025.
