Shillong, ïaïong, 07: U Bah J. J Lyngkhoi uwei na ki riew rangbah uba shong basah ha syndah jong ka Wah Umkhen u la kren diaw da kaba ong, ‘lada duh noh ka wah Umkhen kan long kumba ngi duh noh ïa ka jingim.”
Ha u kyrwoh ba u la phah sha ka Batesi TV ryngkat ki dur bad ki video kiba u la ring dur hadien ba ladep tong dohkha ha ka wah Umkhen u Bah Lyngkhoi u la ong ba ka wah Umkhen ka dei ka wah kaba ju bsa ïa ki paidbah nongshong shnong jong ka shnong Mynriang, Bamkamar, Nongkhroh, Thadrang, Ummluh bad kiwei kiwei de ki shnong kiba don mar syndah bad kane ka wah.
Kane ka jingkren diaw jong une u nongrep na ka shnong Mynriang ka long hadien ba ka tnat Pynroi Sor jong ka Sorkar Jylla ka la tyrwa ban pynkynriah noh ïa ka jaka thehniut na Marten sha u Lumsohlait uba don ha ka shnong Nonghali ha kaba ka jngai hapdeng ka jaka thehniut bad ka Wah Umkhen ka long tang 100 mitar nalor ba ka jaka ka long sharing bad noh padun.
Dang shen ha u Lber, 2025 ka Ophis Deputy Commissioner ka East Khasi Hills District ka la lum da ka jingïalang ïa ki nongmihkhmat jong ki shnong bapher bapher kiba don ha khappud ka East Khasi Hills, Ribhoi bad West Jaiñtia Hills District ban ïathir sani bad ban ai jingpynshai halor ka jingthmu jong ka tnat Pynroi Sor ka Sorkar Jylla ban shna ïa ka thehñiut ne ka Integrated Solid Waste Management Facility ha u Lum Sohlait uba don ha ka shnong Nonghali.
Ha ka jingïalang, la rai ba ki ophisar na ka Meghalaya State Pollution Control Board (MSPSCB) bad ka tnat Pynroi Sor ka Sorkar Jylla kin sa leit pynshai sha ki shnong bapher bapher kiba don ha ka par Umkhen halor ka jingshna ïa ka jaka thehñiut ka ban ym ktah ïa ki sawdong sawkun jong ki shnong kiba don marjan bad ka jaka theh ñiut.
Shwa kane, ki paidbah nongshong shnong ki la mih ban pyrshah ïa ka Public Hearing ha kaba ïadei bad ka jingthmu ban shna ïa ka jaka theh niut jong ka Shillong Municipal Board (SMB) ha u lum Sohlait ha ka shnong Nonghali.
