Shillong, K’lyngkot, 19: Ka Khasi Students Union (KSU) ha ka Lah Sngi u Blei ka la aipor tang shi taiew ïa ka Meghalaya Public Services Commission (MPSC) ban pyntreikam lut ïa baroh ki jingai jingmut jong ka MPSC Reforms
Committee 2025.
Shwa kane, ki nongïalam ka KSU lyngba ka Employment and Monitoring Cell ki la leit ban ïakynduh ïa u Chairman jong ka MPSC u Bah D. Langstang ban ïakren biang ïa kijuh ki mat kiba ka KSU ka la ïai dawa bad aiti ïa ki dorkhas la bun tylli.
Ha kane ka jingïakynduh mynta ka kynti, u Chairman jong ka Employment and Monitoring Cell, KSU u samla Reuben Najiar u la ong, “ngi la thait ban ïakren bad ka MPSC ïa kajuh shi kajuh ka mat. Lah shu ïa kren shi ïakren bad lah shu ai shi ai dorkhas hynrei ka jingkylla kam don satia.”
Ka KSU ka la dawa ïa ki bor pynïaid jong ka MPSC ban pynbeit ïa ka rukom thoh eksamin bad ka rukom thungkam thungjam ïa ki samla ka jylla khnang ba ka jingthungkam thungjam bad ki jingpynlong ïa ki eksamin thungkam kin long kiba khuid kiba ym lah ban leh tuh.
“Shisien ba la mih ka kaiphod na ka komiti, ka MPSC ka ladei ban pyntreikam. Hynrei kumba ngi tip haduh mynta ym pyntreikam satia,” u la ong.
“Ha ka 19 tarik, Nohprah, 2025 ha ka por ba ngi leit ban ïakynduh ïa u Chairman, ngi lap ba u Secretary barim (ka MPSC) u Anish Marak u dang don wat hadien ba la pynmih ïa ka shithi pynkynriah kam la san bnai bad ngi la hap ban ai por 24 kynta ba u dei ban mih noh napoh ka MPSC bad hadien ka jingbyrngem jong ngi, la thung Secretary da kiwei pat,” la ïathuh u samla Najiar.
“Ngi la ïaid da ka lynti kaba dei bad lada kita ki jingkylla ba la wanrah da ka Sorkar lada ka MPSC kam wanrah, lehse ka jingkylla kan wan lyngba ka ding bad ka snam,” la maham u samla Najiar.
Haba kylli, u la ong, “balei ki pynslem, ka daw ka long ba kim kwah ban wanrah ïa ka jingthungkam kaba khuid namar lada ki samla ki ïohi ïa ki marks ki tip katno ki ïoh ha ka eksamin bad ha ka personal interview kan buh ïa ka jingkylli.”
