Shillong, Rymphang 18: Ka Synjuk ki Rangbah Kur ka Bri u Hynñiewtrep ha ka sngi Baar ka la mih shakhmat ban kyrpad ïa ki paidbah nongshong shnong jong ka rilum Khasi bad ka rilum Jaiñtia ba ki dei ban da khan, ban puson bha bad ban da pynshong nongrim bin pa bin haba ki jied ïa ki nongmihkhmat sha ki ar tylli ki Autonomous District Council (ADC) ha rilum Khasi bad ha rilum Jaiñtia ha ka elekshon ka ban sa long ha ka 21 tarik mynta u bnai.
Haba kren sha ki lad pathai khubor, u Working President jong ka Synjuk u Bah Erwin K. Syiem Sutnga u la ong, “lada ki bakla ki paidbah ban jied ha ka 21 tarik, ka mut kan plie ïa ka jingkhang na ka bynta kita kiba kwah ban ai jait kpa kin ai jait meikha kin ïoh ka lad ka lynti kaba shyrkhei bad kane kan wanrah ïa ka jingeh.”
“Ngi donkam ïa ki nongmihkhmat kiba sngewthuh ïa ka jingkordor jong ka Sixth Schedule, kiba sngewthuh ïa ka jingkordor jong ka riti synshar ka ri India, kiba sngewthuh ba ngi don ka bynta kaba kyrpang hapoh ka imlang ka sahlang hapoh ka ri India, ha ka Bri u Hynñiewtrep bad kumjuh ruh ha ka Meghalaya ngi donkam ban pyrkhat ba ki District Council ki don ka bynta ba la wanrah ïa ki” pynpaw u Bah Sutnga.
“Lada kim pat sngewthuh ïa ka Sixth Schedule, ki donkam ban long kiba kloi ban kylli bad pyrthew, kiba puson bad ki ban ïatreilang. Ïa ka Sixth Schedule ha ka por ba la shna ïa ka, ym shym la pynshong nongrim ha ka jingdon jong ki seng saiñ hima hynrei dei ki seng saiñhima kiba wanrah ïa ki jingpynkylla ha ki AD Rules,” u la bynrap.
Haba kyntu ïa ki nongmihkhmat ki ban sa jied kum ki dkhot jong ki ADC, u Bah Sutnga u la ong, “haoid, phi wan na ki seng saiñhima bapher bapher hynrei ynda phi la thaw ïa ka Executive Committee phi dei ban thaw halor ka nongrim ai jait kmie, ka nongrim ba ngi dei ki ritpaid hapoh ka ri India, ban ïada ïa ka khyndew ka shyiap, ban ïada ïa ka riti ka dustur.”
“Naduh lashai (sngi Palei) janmiet haduh ka 21 tarik ka dang don ka por ba ki paidbah kin pyrkhat. Kum ka Synjuk ki Rangbah Kur ngi dei ka thymmei pyrkhat jong ka jaidbynriew. Ngi kwah ruh ban saiñdur ïa ka saiñpyrkhat jong ki paidbah. Ki pyrsa kur jong kawei pa kawei ka khun, ki khun kur jong kawei pa kawei ka kur, namarba dei ki kur kiba pynlong ïa ka jaidbynriew bad ka jaidbynriew khlem ka kur kam don ïa ka snap ba paka,” ong u Bah Sutnga.
“Kum ka Synjuk ngi kyrpad ïa ki nongthep vote ba kin pynshong nongrim namarba ka Sixth Schedule ka dei ka stieh jong ka jaidbynriew. Kane ka stieh mynta ka la don palat 70 snem. Ngi kyrpad ïa ki paidbah nongthep vote khamtam ki samla ba kin pynshong nongrim bha namar ngim dei ban duh noh ïa ka snap ba paka jong ka jaidbynriew ai jait kmie. Ngim dei ban pyrkhat ba ngin ïoh leh katba mon,” u la bynrap.
“Na ka synjuk ka don ka jingmaham, khamtam ïoh wan ka sang ka ma kam dei tang shi bynta, ka sang ka ma ka wan na ka bynta kaba ïadei na u thied sohpet. Kane ka bynta ha ka sang ka ma ka don ka jingktah khamtam leilei lada bakla ka shong kurim wat hapdeng shi bakha ruh,” la maham Bah Sutnga.
“Lada ngi duh noh ïa ka snap ba paka jong ka jaidbynriew ai jait kmie kane kan ap jingma ïa ka jaidbynriew,” ong shuh shuh u Bah Sutnga.
U Bah Sutnga u la ong ruh ba ki nongmihkhmat ki dei ban long kiba kloi kiba peit ïa u duk u suk, kiba kloi ban sngap ïa ka jingud jingnam jong ki nongbylla.
U la ong ruh ba ka jingai jingmut jong ka Synjuk ïa ki nongmihkhmat ban sa shah jied thymmai ka long ban wanrah ïa ka jingkylla ha ka 125th Amendment jong ka Sixth Schedule.
