Shillong, ïaïong, 05: U samla Evanshan Nongrum u khynnah pule jong ka Sacred Heart Boy’s Higher Secondary School, Shillong uba la ïoh rung ha ka kyrdan kaba ar ha ka Top 20 jong ka result Secondary School Leaving Certificate (SSLC) ba la pynbna da ka Meghalaya Board of School Education (MBoSE) ha ka sngi Saitjaiñ u la ong ba u lada u Blei u ibit u don ka jingangnud ban long Lyngdoh Sohblei.
Une u samla mynta uba dang pynkhreh ïalade ban long Lyngdoh Sohblei u sah ha Savio Juniorate, Mawlai ka skul ba la pynïaid da ki Phadar ka Jingïasyllok Salesian ha ka Jyllaniam Bah Shillong.
Ha ka jingïakren bad ki lad pathai khubor hadien ka jingleit ai khublei ïa u Principal bad ïa ki nonghikai jong ka skul da ka jingsynran lang jong u kpa Bah Walking Lamare bad ka Kmie Kong Rose Mary Nongrum, u samla Evanshan Nongrum u la ong, “lada u Blei u ibit nga kwah ban long riewniam, “bad bynrap, “kane ka jingjop jong nga sha ka thong ka dei ka jingïasaid jong ka Maria Theisotti bad aiti ïa kane ka jingjop jong nga sha i mei i kpa kiba la don ha kti ha kjat ban kyrshan lem ïa nga naduh ba nga dang rit haduh mynta.”
“Ka jingjop jong nga ka dei na ka daw ki nonghikai skul kiba hikai pyntbit kat kaba ki lah isynei bad kumjuh ruh ïa i Principal bad ïa baroh kiba la kyrshan lem ban ïarap ïa nga,” la ainam u samla Evanshan ïa ka jingjop jong u.
“Ngam shym la khmihlynti ban ïoh ïa kane ka kyrdan, hynrei nga la shu duwai beit ha u Blei ba ka result jong nga kan long kaba bha ba ngan leh kat kaba nga lah bad nga aiti ha u Blei ïa ka burom baroh,” u la bynrap.
Haba kylli, u la ong, “ha ka shi sngi nga khreh kot kumba 7 kynta shi sngi lada nga lah bad naduh ba sdang snem nga ïai minot ryngkat ka jingduwai.”
U la ong ruh ba um ju pyndonkam satia ïa ka mobile phone ban wad jingtip kumba long lem kiwei pat ki para khynnah hynrei haba um sngewthuh ïa kano kano ka lynnong kot u ju kloi ban phai sha la ki nonghikai ban pan jingïarap.
Ha kaba ïadei bad ka jingpynmih jong ka tnat Pule Puthi ïa ka CM Impact Guide Book ban ïarap ïa ki khynnah kiba pynkhreh ïa ka eksamin SSLC mynta u snem 2025, u samla Evanshan u la ong, “nga peit malu mala hynrei ngam da shaniah than namar dei da ka jinghikai jong ki nonghikai bad na ka kot hi kaba lah ban ïarap ïa ngi.”
U la ong ba um shym la khmihlynti satia ba un poi sha ka kyrdan kaba ar hynrei ka dei tang lyngba ka jingtrei shitom bad ka jingshaniah ha u Blei ba un ïoh ïa ka result kaba bha da kaba leh katba lah.
Haba phah ïa u kyrwoh sha ki para khynnah kiba dang don ha ka jingpule, u samla Evanshan u la ong, “ka jingpule jong ngi ka long kum ka marathon (mareh thong) ngim lah ban jam shi synjam hynrei ngi hap ban ïaid stet suki pa suki manla ka sngi.”
U Kpa Bah Walking Lamare u la ong, “haba ki khun ki leh bha ngi dap da ka jingkmen bad ïa ka jingjied ïa ka lynti kaba bha ngi long tang ki nongkyrshan.”
