Shillong, Rymphang, 02: Ka Voice of the People Party (VPP) ha ka sngi Thohdieng ka la phah da ka dorkhas sha u Lamphang jong ka Ingdorbar Thawaiñ ka Jylla u Thomas A. Sangma halor ka jingdawa ban buh da u nongpynkylla ktien lada u Lat ka Jylla u Phagu Chauhan um lah ban kren da ka ktien Phareng ha ka jingai jingkren ha ka sngi sdang jong ka Dorbar Mang Tyngka ka Ingdorbar Thawaiñ ka Jylla.
Ka Dorbar Mang Tyngka jong ka Ingdorbar Thawaiñ ka Jylla kaba phra sngi kan sdang naduh ka 16 tarik mynta u bnai bad kan kut ha ka 27 tarik mynta u bnai.
“Katba ngi dang pynkhreh ia ka Dorbar Mang Tyngka jong ka Ingdorbar Thawaiñ ka ban sa long, nga thoh sha phi ban kdew ia ka mat kaba kongsan tam kaba iadei bad ka ktien ka thylliej ban iakren ha ka sngi shong dorbar,” la ong u Secretary ka VPP Bah Heavingstone Kharpran ha ka dorkhas ba la phah sha u Lamphang.
“Kum ka jingai jingmut ha ka Dorbar Mang Tyngka bad na ka bynta ka jingbiang lang jong ki nongmihkhmat ba la jied da u paidbah, ka long kaba donkam ba baroh ki dkhot jong ka Ingdorbar kin dup lah ban sngewthuh ia ka jingmut ba shisha bad ban iashim bynta ha ki jingiatai. Hynrei, la shem ba ha ki sien shong dorbar ba ladep, u Lat u la ai jingkren hapoh ka Ing da ka ktien Hindi, kaba la wanrah ia ka jingbym sngewtynnat ia ki nongmihkhmat ki bym sngewthuh ia ka ktien Hindi bad ban buh jingmut ruh ba ka ktien Hindi kam dei ka Official Language jong ka Jylla Meghalaya,” la ong ka dorkhas na ka VPP.
“Ha kaba iadei bad kane, ha ka kyrteng jong ka Voice of the People Party, da kaba burom nga pyntip ba ka jingialang jong ka Parliamentary Party kaba la long ha ka 30 tarik, Kyllalyngkot, 2023, ka kyrpad ia phi ba ia ka jingkren jong u Lat dei ban thoh ha ka ktien Phareng bad lada u Lat badonburom um lah ban ai jingkren hapoh ka dorbar da ka ktien Phareng, ka ophis jong phi ka lah ban buh nongpynkylla ktien ia baroh kawei ka jingkren jong u na ka bynta ka jingbit jingbiang lang baroh,” la iaid ban ka VPP.
“Da kaba pynthikna ba ka jingiatai ia ka Dorbar Mang Tyngka kan long ha ka ktien kaba lah ban sngewthuh lut da baroh ki nongmihkhmat, ngin kyrshan ia ki nongrim jong ka jingkhuid, ka jingiaryngkat bad ka synshar ka khadar kaba jop. Khatduh iawai, ka party ka kwah ban kdew da kaba shai ba kan ym iashim bynta ia ka jingiatai lymda ka Assembly Secretariat kam lah ban pynurlong ia kane ka jingdawa,” la pynpaw ka VPP.
