Shillong, Nailar 05: Ka Deputy Commissioner bad Chairperson ka District Disaster Management Authority (DDMA) ka East Khasi Hills, ka la kyntu ïa ki paidbah ba kin kiar na ki jingleit jingwan ki bym donkam sha ki thaiñ Pynursla bad ki jaka ba marjan khamtam ha kane ka por lyiur.
Ha ka kyrwoh khubor ka la ong ba ka jingther u slap uba jur bad ka jingduh lyoh khyndew, ka buh ha ka jingma kaba khraw ha ki jingjia aksiden kali bad ka jingtwa khyndew ba man ka por khamtam ha shi lynter ka surok Shillong – Pynursla.
La ong ba ïa kane la pynmih hadien ka jingjia aksiden ba jia ha ka miet sngi U Blei kaba la shim jyndat ïa ka mynsiem ki 5 ngut ki briew kiba dei na kajuh ka longïing. Kine ki briew kila ïap hadien ba ka kali ba ki shong kala hap shapoh ka riat Rngain.
Kumta la kyntu ruh ïa ki paidbah ba kin kiar ban leit ban wan sha ki jaka jong ka thaiñ khlem da donkam eh, lada donkam shisha ban leit, ki paidbah ki dei ban leit da kaba phikir bha ïalade bad daka jingtip khamtam halor ka jinglong jingman ka suiñbneng.
Ha kaba ïadei bad kane la kyrpad ïa ki paidbah ba kin bud ryntih ïa ki jingbthah bad ki jingmaham ba la pynmih da SDO (C) Pynursla and DDMA, East Khasi Hills bad ban phone ha u number 112 lada jia ba donkam jingïarap kyrkieh.
