Shillong, Nailur, 02: U Myntri tnad Jngohkai Pyrthei u Bah Paul Lyngdoh ha ka sngi Baar u la pyntip ba ka projek ban pynheh ïa ka Shillong Airport ka la ïaid shakhmat, ha kaba ïa ka jingkhot tender ladep ban sdang bad la khmih lynti ba ka jingtrei kan sa sdang noh shen.
“Ka projek pynheh ïa ka Shillong Airport kan sa wanrah ka jingkylla bad mynta katba ngi dang kren ka jingkhot tender ka ladep sdang bad ka jingtrei kan sdang noh shen,” ong u Bah Paul haba ïakren bad ki lad pathai khubor.
“Ha kaba kut jong u snem 2026 ngi kyrmen ba ka jingpynheh ïa ka Shillong Airport ruh kan sa dep bad kata kan sa pynmyntoi ïa ki nongjngohkai pyrthei,” u la ong.
U Bah Paul u la kdew ruh ba ka Shillong ka la shah jied kum ka jaka jngohkai pyrthei kaba ki briew ki sngewtynnat bha ha ka ri.
U la ong, “ka dei ka jingjop kaba phylla tam na ka bynta ka jylla hynrei ka bym pat don ïa ka kad liengsuiñ kaba treikam pura.”
Ka Sorkar ka la pynbna ruh ïa ka jingthmu ban wanrah ïa ka jingshakri da ka Helicopter sha ki jaka jngohkai kiba pawnam kynthup ïa ka Umïam, Sohra, Dawki, Shillong bad Mawsynram.
“Ka jingthmu jong ngi ka long ba ngin pynsted ïa ki kam. Ngi dang ïakren bad ka Ministry of Aviation,” la ong u Myntri.
