Shillong, Naitung, 21: U MLA ka Rongara-Siju Constituency u Rakkam A. Sangma uba long ruh u Myntri ka Sorkar Jylla u la ïathuh ba u ladep phah ïa ka dorkhas sha u Myntri Rangbah ka Jylla u Conrad K. Sangma ban kyrpad ïa ka Sorkar ba kan pynïasoh ïa ka lynti Rel na Mendipathar sha ki bynta jong ka Baghmara, South Garo Hills lyngba ka Nongalbibra ne Tura, Tikrikilla, Dalu.
Ha ka jingïakren bad ki lad pathai khubor ha ka Lah Sngi u Blei u Rakkam u la ong, “lada ngi phaidien biang shwa ban ïoh ïa ka jinglaitluid ka don ka jingïadei kaba jan bha bad ka East Pakistan (Bangladesh ba mynta) watla kam long lyngba ka lynti Rel. Ngi la seisoh ha ka khaïi ka pateng ha kito ki por hynrei ynda la phiah ïa ka ri India, ngim lah shuh ban ïa khaïi bad ka ri Bangladesh ne bad ka Pakistan. Ngi don bun byllai ki mar rep kiba ngi lah ban pynïaid iew.”
“Lada phi ïakren shaphang ka jinglong jingman ha ka ri Bangladesh, ka thong ba hakhmat eh jong ngi khamtam na ka bynta ki nongshong shnong jong ka jylla Meghalaya ka dei hi bad ka ri Bangladesh,” u la ong.
Haba kylli, u laong, “haba peit pat ïa ka jinglong jingman ha ka saiñhima sima ka la long da kawei pat ka khana bad lada ka jinglong jingman ka ïapher ne ka long kaba shongsuk shongsaiñ, ka ri Bangladesh kan jin da la long kaba biang eh ban ïa khaïi bad ki jylla ka thaiñ Shatei Lammihngi bad kumjuh ruh bad ka jylla Meghalaya.”
“Ngim lah ban shu iehnoh ïa ka kamai kajih jong ki paidbah jong ngi namarba kata ka long kaba kongsan bha. Ka jingbun briew jong ngi ka nang kiew bad ka ïohkam ïohjam ruh ka donkam bha. Lashai hadien habud ngin sa mad jingeh. Kata kam dei tang ïa ka jylla Meghalaya marwei hynrei ka dei hi ka jingjia ha kylleng ka pyrthei. Ngi dei ban plie ïa ki lad ki kabu. Ka iew ka hat ki dei kiba kongsan. Bun na ki khun samla ki kwah ban sengkam sengjam la ka long ha ka jngohkai pyrthei, ka rep ka riang, ka kit ka bah, ki karkhana bad kiwei kiwei,” la bynrap u Sangma.
U la ïathuh ba u Myntri Rangbah shen un sa phah ïa ka dorkhas jingtyrwa ban pynïasoh ïa ka lynti rel sha ka Sorkar India ba kan bishar.
