Shillong, Jylliew, 03: U Myntri ka Sorkar Jylla uba khmih ïa ka tnat Revenue & Disaster Management Bah Kyrmen Shylla ha ka sngi Baar ula ong ba ka Sorkar ka ladep mang ïa ka pisa sha ki ophis jong ki Deputy Commissioner na ka bynta ban pyllait ïa ka song jingïarap sha ki lanot kiba la shah ktah ha ka jinglynshop ki bor ka mariang.
Ha ka jingïakren bad ki lad pathai khubor, u Bah Shylla u la pyntip ba ka pisa kaba kot T. 4.59 klur la mang sha ka ophis Deputy Commissioner ka East Khasi Hills, T. 1.22 klur ïa ka West Khasi Hills, T. 60.71 lak ïa ka South West Khasi Hills, T. 1.21 klur ïa ka , Ri Bhoi, T.75.37 lak ïa ka West Jaiñtia Hills, T. 4.82 lak ïa ka East Jaiñtia Hills, T. 1 klur ïa ka East Garo Hills, T. 1.85 klur ïa ka West Garo Hills, T. 91 lak ïa ka North Garo Hills, T. 1.18 klur ïa ka South Garo Hills, T. 1.46 klur ïa ka South West Garo Hills bad T. 4.47 klur ïa ka Eastern West Khasi HIlls.
U la ïathuh ba hynriew ngut ki briew ki la ïap na ka jinglynshop ki bor ka mariang na ka jingther jong u lapbah lapsan.
“Ïa ka bailutksan kaba mar T. 4 lak la pyllait sha ki bahaing hasem jong ki lanot haduh mynta,” la bynrap u Bah Shylla.
U la ong ruh ba ki paidbah ki donkam ban ïatreilang bad ban ai ka kti ka mon ka kti ka diang ban pyllait im ïa ki mynsiem briew kum ha ki jingjia lynshop ki bor ka mariang.
Shuh shuh u la kyrpad ïa ki nongjngohkai pyrthei kiba wan kai sha Meghalaya ban long kiba husiar bha ïa ka jinglong jingman ka jylla khamtam ha ka por lyiur ba jur bha u slap.
