Shillong, Nailar, 30: U Symbud Myntri Rangbah uba khmih ïa ka tnat Kam Pohing u Bah Prestone Tynsong ha ka sngi Thohdieng u la ïathuh ba ka jingtohkit halor ka jingkynnoh thombor da ki shipai BSF ïa ka longing ha ka shnong Kuliang, East Jaiñtia Hills District ka la dep.
“Ka jingtohkit ka ladep bad la pynkhreh sa tang ban shu pynngat kyndon,” la ïathuh u bah Tynsong haba jubab ïa ka Call Attention Notice ba la wanrah da u MLA ka VPP na Mawlai u Bah Brightstarwell Marbaniang ha Ingdorbar Thawaiñ ka Jylla.
U la pyntip hadien kane ka jingjia, ïa ka case la rejistar ha Khliehriat Woman Police Station bad la pynngat hapoh ka Ssection 457, 236, 354, 384 bad 34 Indian Penal Code, pule lang ba dka Sections 7 bad 8 jong ka POCSO Act.
U la ong ba ha kajuh ka sngi ha ka 20 tarik Jylliew, 2024, ki nongujor bad ki lanot ki la leit shah eksamin bad la shim ruh ïa ka jingkren jong ki bad baroh ki jingdonkam ruh la pyndep kum ka Medical Examination, ka jingleit jurip bad tohkit ïa ka jaka ba la jia bad ka jinglum ïa ki sakhi sabut katkum ka aiñ.
Ha ka 20 tarik, Jylliew, ïa ka ejahar la ujor da ka Kong Martina Poshna na ka shnong Kuliang East Jaiñtia Hills ba ha ka miet 19 tarik Jylliew, kumba ha ka por antad 11.30 baje mynmiet, lai ngut ki briew ba la kam ba ki dei ki shipai BSf ki la rung jubor hapoh ka ingsah jong ka.
Kine ki briew ki la rah ruh da ki tiar pynmynsaw, kynthup ïa ka suloi bad ka wait bnoh bad phong ruh da ki riam paidbah. Ki la rung jubor hapoh ka ing bad tang mar ïarung hapoh ka iing, ki la ktah kti shwa ïa u Bah Shanroi Lyngdoh, bad knieh ruh ïa u sdie na ka ing bad pyrshang ruh ban pyntieng ïa kane ka longing da une ujuh u sdie.
Wat hapdeng ka jingpynsngewthuh bad ka jingïakhun jong ka kong Martina Pohshna bad ka khun kynthei ba dang 15 snem hynrei ki la shah thombor pynban ha kine ki lai ngut. Ki nongthombor ki la ïai bteng ruh ban thombor ïa u Bah Shanbor, kat haduh ba u la mynsaw na ki bynta jong ka krung.
Tang hadien kata, ha ka por kumba 12.30 baje mynstep, kine kijuh ki briew ki la wan phai biang bad sa palat 15 ngut ki briew bad bteng ban shoh dusmon ïa u Bah Shanbor Lyngdoh.
Ha ka jingthombor ha ka sien kaba ar, ki la knie jubor ïa ka mobile phone jong ka khun kynthei kaba dang 15snem ka rta bad la kynnoh ruh ba ki la jrong kti ïa ka.
Haba ka kong Martina ka la ieng ban ïada ïa la ka jong ka khun kynthei, ma ka ruh ka la ngat ha ka jingshah thombor. Ki nongthombor ki la byrngem ruh ïa kane ka longing da kaba pynap suloi.
