Shillong, Nohprah, 20: Ka kynhun ïalehkai kriket Combine XI Laban Pyllun ka la ïoh rah ïa ka nam lahduh da kaba pynliem noh ïa ka Rangkynsai Cricket Club ha ka jingïakhun phainal 3rd Maitshaphrang Khasi League T20 Cricket Tournament 2025 ba la pynïaid da ka Khasi Student Union kaba la long ha ka sngi Saitjaiñ ha madan ka MCA ha Polo, Shillong.
Ïa khusnam Player of the Series la ïoh rah da u Shavian P. Blah na ka Rangkynsai Cricket Club uba la lah ban kamai 318 run bad ïoh khur 8 wicket, katba ïa ka nam Man of the Match la ïohrah da u Erich Lyngdoh uba la lah ban kamai 38 run bad ïoh khur 1 wicket.
Kiwei pat ki rangïalehkai kiba la lah ban ïoh khur ïa ki khusnam ha kane ka lympung ïalehkai ki long u Nathaniel Pyngrope na ka Donkins Cricket Club uba la ïoh khur ïa ka nam Best Under-19 hadien ba u la lah ban ïoh khur 5 wicket.
Nalor kata, u Shavian P. Blah uba la ïoh khur ïa ka nam Best Under-23 da ka jinglah ban ïoh kamai 318 run bad ïoh khur 8 wicket bad ïoh khur ruh ïa ka nam Highest Run Scorer, katba u Charm Marbaniang na ka Rangkynsai Cricket Club u la ïoh ïa ka nam Highest Wicket Taker da kaba ïoh khur haduh 15 wicket.
Ha kane ka jingïalehkai la sakhi lang da u Myntri ka tnat Sports and Youth Affairs ka Sorkar Jylla u Bah Wailadmiki Shylla uba la long kum u kongsan bad ki nongïalam ka Khasi Students Union, ki nongkitkam jong ka Meghalaya Cricket Association bad ka Shillong Cricket Association bad ki rangbah shnong na ki shnong kiba don ha jylli ka sor Shillong.
