Babu Kular Khongjirem
Ka result jong ka Half Yearly Examination mynta u snem 2026 ka lah ban hiar bha bad bun na ki khynnah skul bapli ki lah ban liem bad kylla lyndang ei ha ki subject bapher bapher khamtam ïa ka subject Mathematics bad Social Science.
Ka jingmut dur jong ki kmie ki kpa ne ki nongpeit nongsumar jong ki khynnah ka lah ban kylla khongpong ei kha-ma-kha hadien ba ki la ïoh ïa ka result jong ka Half Yearly Examination jong ki.
Ki don bunbah ki daw ba balei ki khynnah kim lah satia ban leh bha mynta ka sien. Ki Kmie ki kpa ne ki nongpeit nongsumar jong ki khynnah ki lah ban kynnoh ïa ka skul ne wat ïa ki nonghikai jong ki ruh, hynrei kam dei satia kumta. Ki daw bah tynrai jong ka jingliem lyndang ka dei beit na ka jingleh kulmar ka sorkar kaba la pynkylla tdong-tdong, khlieh-khlieh ïa ka eksamin ki khynnah khlem da pyrkhat ba kan ktah shikatdei eh ïa ka jingpule jong ki khynnah bapli khamtam kito ki khynnah kiba shu pdeng (average students) bad ki khynnah kiba kham duna shuh shuh (below average students). Ïa ki khynnah kiba stad te (above average students), phi pynkylla kyrkieh ruh, kam da ktah than ïa ki.
Ki Kmie ki kpa bad ki paidbah baroh ki dei ban tip shai kdar ba mynta u snem 2026 naduh ka Half Yearly Examination ka Routine bad ki jingkylli jong baroh ki subject la ai bad set hi da ka sorkar lyngba ka tnat Pule Puthi. Ka sorkar ka phah hikai bun bah ki lynnong (chapters) haduh ba la shu thngian jubor justi ïa ki khynnah tang ban pyndep ïa ki lynnong namarba bun ki ong ban set jingkylli lut ïa kita ki lynnong kiba ki la bthah. Don ki subject ba ka DERT kam ai jied (no choice) ïa ki khynnah bapli. Don ruh ki jingkylli kiba artatien ki khynnah ban jubab bad kumta ter. Kaba shu kohnguh katba bthah ka sorkar ka long pynban ka jingma bad jingktah ïa ka pule puthi ki khynnah.
Ka Routine ruh ki pynkylla katba mon shu kynsan kynsan katba ki sngewbit. Ka Social Science kaba dei ha ka sngi 23-06-2026 la shu rah kyrkieh tang shi miet ar miet sha ka 30-06-2026 nalor ba ka 29-06-2036 ka la dei lypa ka subject Mathematics, ka sobjek kaba ki khynnah ki kham shem jingeh. Kumno ka subject Mathematics bad ka Social Science kin shu pynlong ter ter baroh ar sngi syndon khlem pyrkhat ban ai off-day ïa ki khynnah bapli. Katba naduh 22 tarik haduh 26 tarik Jylliew 2026 pat (baroh shi taiew lynter) ki pynlong tang shi sobjek baroh shi taiew lynter, kata, tang shi sngi ha ka sngi 25-06-2026, lait nangta ym don eksamin baroh shi taiew.
Ha ki sngi ai result bun ki khynnah kin sngewsih,bun ruh kin ïam pait dohnud. Hato! kata ka jingïam pait dohnud ki khynnah kam ktah seh ïa ki Kmie ki kpa ki ban wan synran lang ban wan shim ïa ka result bad ki khun lajong. Ki kmie ki kpa jong ngi hangne ha Ri Khasi-Jaiñtia ki dei kiba shu hun bad kohnguh bad ngeit sneng. Katba sha ri thor pat, bakla tiak, ki khynnah bad ki kmie ki kpa kim ai lad satia ba ka Sorkar kan shu pynlong langknia ïa la ki khun bad ka lawei ka thoh ka pule jongki.
Ym nai pyni ïa ka Parent Teachers Meeting (PTM) kaba la ai hukum ba kan long ha ka 15-07-206 ha baroh ki skul ha Meghalaya. Yn nai ïa kren ruh ïa ka hukum phah pynlong skul noh ka sorkar ïa ki skul baroh ha ka 06-07-2026 bad kata ka hukum ki la pynmih ha ka miet 01-07-2026 (6 baje janmiet eiei), shi sngi hadien ba ladep ka Half Yearly Examination (30-06-2036) katkum ka routine sorkar.
Kane hukum pynlong skul ka mih hadien ba khynnah ki la ïa poi ing ne poi shnong lut baroh. Sha nongkyndong, ym don network, teng teng ym don bording ruh, kumno ban shu hukum pynlong skul khlem pyrkhat hadien ba la dep khang ïa ka skul bad ladep ai shuti shiteng snem ruh ïa ki khynnah.
Dei kane kein ka jingleh lamwir ka Sorkar la kumba leh u Muhammad Tughlaq hyndai ka ban pyntroin bad pynjlep ïa ka lawei jong ka thoh ka pule jong ki khynnah hadien habud.
