Shillong, Rymphang, 01: Ka Seng Samla Hima Langrin (SSHL) ka la maham lypa ïa ki paidbah ba kim dei satia ban ngop ïa ka jingkhot tender da u Acting Chief jong ka Hima Langrin u Bah B.H Syiemiong ban aiwai ïa ki mar jong ka Hima bad kam ruh ba kino kino kiba ngop ki lah ban ngat ha ka jingshah thok.
Ha ka jingïakren bad ki lad pathai khubor ha ka sngi Saitjaiñ u Presient jong ka Seng Samla Hima Langrin Bah PS Lyngdoh u la ong, “katkum ka pynbna ba la pynmih da ka ophis u Acting Chief jong ka Hima Langrin ba la phah sha ki Secretary jong ki Dorbar shnong la bthah ban pyntip ban ai jingpynbna ba kan don ka jingaiwai ïa ki mar jong ka hima ha ka 7 tarik mynta u bnai.”
“(Mynta) ka dang don ka Model Code of Conduct (MCC)….ngi sngewlyngngoh kumno ki lah ban aiwai ïa ki mar hima khlem da ïoh jingmynjur na ka Khasi Hills Autonomous District Council. Halor kane ka nongrim, ngi la leit ban ïakynduh ïa u Deputy Secretary Incharge Market. Ka jingleh jong u Acting Chief ka long be-aiñ khlem da ïoh jingmynjur na ka District Council,” la ong u Bah Lyngdoh.
U la ong ba hadien ka jingaiwai ïa ki mar Hima, ka KHADC ka donhok ban ïoh ïa ka bhah kaba shi bynta na ka phra bynta. “Kumno ki ïaid lait na ka District Council khlem da bud ïa ki kyndon ba la bthah da ka District Council,” u la bynrap.
Haba kylli, u Bah Lyngdoh u la ïathuh ba ki mar hima kiba u Acting Chief u la pynbna ban khot tender na ka bynta ban aiwai ki kynthup ïa ka iew soh Langrin, ka iew Mawpyllun bad ka iew Borsora, ka bai khrong musur, ka jingmih na ki mar rep na Rilang, Wahkaji kynthup ruh ka wah tong dohkha na Kynshi bad ka Khawa Lieng nalor kiwei kiwei.
Da kaba pyntip ba ki don ki daw shalyndet kiba ka KHADC kam shym la ai jingmynjur ïa kane ka jingkhot tender da u Acting Chief ka Hima Langrin ka long hadien ba une u Acting Chief um shym la leit hajir satia hadien ba ka District Council ka la phah ïa ka Show Cause Notice ban pan jubab halor ka jingujor jong ka Seng Samla Hima Langrin.
“Nalor ba u khlem leit hajir hakhmat ka District Council hadien ka jingai Show Cause Notice mynta u thmu sa ban ai wai sop sop,” la kynnoh shuh shuh u President ka Seng Samla Hima Langrin.
