Shillong, Nailur, 10: U MLA jong ka NPP u Limison D Sangma uba mihkhmat na Raksamgre Constituency un sa shimti kum u Deputy Speaker ba thymmai jong ka Ïingdorbar Thawaiñ kaba la buh sngi ban pynlong ïa ka elekshon ha ka 12 tarik mynta u bnai.
U Sangma u dei tang ma u, uba la thep kyrteng ha ka sngi Balang.
Ïa ka jingtyrwa ban long kum u kyrtong la tyrwa da ki Myntri Sorkar ba kynthup ïa u Marcuise N. Marak bad u Abu Taher Mondal.
U Lamphang jong ka Ïingdorbar Thawaiñ u Thomas A Sangma u la pynthikna namarba la ïoh pdiang tang kawei ka jingthep kyrteng, ka jingthep vote kan ïaid beit tang ïa ka jingthep kyrteng jong u Sangma marwei.
“Namar katkum ka por ba la buh lashai ka dei ka sngi ban weng kyrteng lada jia ba don mano mano ba kwah ban weng kyrteng nangta ngi hap ban ai biang ïa ka jingpynbna bad ban buh ïa ka sngi ban jied ïa u Deputy Speaker. Haduh mynta, ngi la ïoh tang kawei ka jingtyrwa,” u la ong ha ka jingïakren bad ki lad pathai khubor.
Ka elekshon na ka bynta ka shuki Deputy Speaker ka la mih hadien ba u MLA ba la rangbah tam jong ka NPP na Resubelpara u Timothy D. Shira u la iehnoh ïa ka shuki da kaba kdew ba ka dei ka jingbthah na ki nongïalam ba halor jong ka party.
