Shillong, Nailar, 27: Ka heprit Chevinia Lyngdoh, 13 snem ka rta kaba sah ha Mawlai Mawiong kaba la long ka nongjop ha ka sur kynud Season-I ba la pynlong dang shen da ka Don Bosco Media Network bad mynta ka kynti ka la ïohrah ïa ka nam lahduh ha ka Vocal Star UK ha ka kyrdan jong ki nongïashim bynta kiba dang hapoh 18 snem ka rta.
Kane ka heprit kaba dei ruh ka Brand Ambassador jong ka DBMN hynnin ka miet sngi Saitjaiñ ka la jop ïa ka rynsan ïakob rwai Vocal Star Competiton kaba la long ha ka ri United Kingdom ha ka kyrdan kiba hapoh 18 snem ka rta.
Da kane ka jingjop, kane ka heprit ka la pynpaw ïa ka jingkmen ka bym lah ong shuh.
Na ki daw ki bym lah ban kiar, kane ka heprit kam shym la ïoh ïa ka Passport ha ka por kaba biang ban leit ïashim bynta ha ka rynsan ïakop rwai kaba la long ha ka ri United Kingdom hynrei da ka jingïarap jong ka DBMN ka heprit Chevinia watla kam shym la ïohlad ban ïashim bynta ha ka Offline Category bad la shu phah ïa ki jingrwai jong kane ka heprit ban ïashim bynta ha ka Online Category.
Ha ka jingpynïaid jong ka Vocal Star UK kane ka heprit ka la ïoh shibun ki points da kaba kheiñ ïa ki Viewers Vote ha ka Grand Finale bad ha kaba kut jong ka jingïakob, ka heprit Chevinia la ïohrah ïa ka khusnam kum ka lahduh.
Ka Don Bosco Media Network ka sngewsarong na ka bynta ka heprit Chevinia bad ka pynshlur ruh ïa kiwei pat ki heprit bad ïa ki khynnah samla ban ïashim bynta ha ki jingïakob rwai bapher bapher ban ïoh kheit ïa u soh jong ka jingjop la ka long tang hangne ha ri la jong ne ha ki rynsan ïakop shabar ki ri jong ka pyrthei.
