Shillong, Jymmang, 05: Ka kynhun ialehkai jong ka Mawlarshong Sports Club ka la ïoh rah ia ka nam lahduh ha ka lympung ialehkai phutbl NDSA Premier League Football Tournament 2024-25 jong ka Super Division ba la pyniaid da ka Nongstoin District Sport Association.
Ka jinglah jong ka Mawlarshong ban ïoh khur ia ka nam lahduh ha kane ka lympung ka la wan hadien ba ka la lah ban pynliem noh ia ka kynhun ialehkai Pyndengrei SCSC lyngba ka tie breaker da 4 kol la 2 kol kata hadien ba ki la ïakhaid namar ka jingbym lah ban ïoh thep kol ha ka jingiakhun final kaba la long ha ka Madan New Nongstoiñ.
Ïa kane ka lympung la pynhap pyrda da u MLA jong ka Nongstoiñ u bah Gabriel Wahlang ha ryngkat ka jingïadonlang ruh u President ka MFA u bah Hamletson Dohling, u MLA barim ka Nongstoiñ u bah Macmillan Byrsat, ki nongkitkam ka NDSA bad kiwei kiwei kiba la sam ruh ïa ki khusnam.
Ïa ka nam best Goalkeeper la ïoh ban rah da u Teibok Lyngkhoi na ka Mawlarshong SC, ia ka nam best players la ïohrah da u Rishan Khardewsaw na ka Nongstoin FT bad ia ka nam top scorer la ïoh rah da u Silvester Thongni na ka Mawlarshong SC bad ia ka nam Emerging player la ïoh rah da u Amosli Nongbri na ka Mawkawah SC.
