Shillong, Risaw, 02: Ka Raj Bhavan Shillong ka la sakhi ïa ki paidbah kiba wan sha kane ka jaka naduh 5 baje mynstep mynta ka sngi haba ki nongmareh ha ki rta bapher bapher ki la poi ban kyntiew kyrteng ïalade na ka bynta ka 5.5 km Swachhata Run hapoh ka Swachhata Hi Seva ban rakhe ïa ka Gandhi Jayanti. Palat 1500 ngut ki briew na Shillong ki la ïashim bynta mynta ka sngi ha ka Swachhata Run ba la pynlong da ka Raj Bhavan bad Central Bureau of Communication (CBC) Shillong ha ka jingïatreilang bad ka tnad kam ïalehkai jong ka East Khasi Hills, Sorkar Meghalaya.
U Lat ka jylla, C. H. Vijayashankar u la plie paidbah ïa kane ka jingïamareh. Kane ka Swachhata Run mynta ka sngi ka dei kaba la pynlong da ka jingthmu ban ai jingtip ïa ki briew shaphang ka jingkhuid bad ban kyntiew ïa ka Swachhata Hi Seva jong ka Sorkar Pdeng, la ong u Lat. U la ïaroh ïa ka jingbun ki briew kiba wan ïashim bynta wat hapeng ka jingther u slap.
Ka 5.5-km Swachhata Run ka la sdang na Raj Bhavan, lyngba ka St. Anthony’s College, Shillong College, St. Mary’s College, Don Bosco Square, Iew Laitumkhrah, Fire Brigade, St. Edmund’s School, Malki Point, Barik Point, Civil Hospital, Main Secretariat, DC Office bad ka la kut ha Raj Bhavan, Shillong.
Ha ka Open Category (Shynrang), u Daniel L Walang, Nahtei Wangnao bad Dasaman Khyndait ki la wan ha ka kyrdan ba nyngkong, ba ar bad ba lai, katba ha ka Open Category (Kynthei), ka Marqueenless Ramsiej, Phyrnai Khyndait bad Dapliss Wahlang ki la wan ha ka kyrdan ba nyngkong, ba ar bad ba lai. U Daniel L Wahlang u la pyndep ïa ka jingmareh ha ka por 17.15 minit katba ka Marqueenless Ramsiej u la pyndep ha ka 22.25 minit. La sam ruh ïa ki khusnam sha ki nongmareh kiba la palat 50 snem ka rta.
Hadien kane ka Swachhata Run ka la don ka jingthung dieng hapoh ka Ek Ped Maa Ke Naam, ha kaba u Lat u la thung ïa ki tynrai dieng ha Nan Palok bad Raj Bhavan. Kane ka kam ha kylleng ka ri ka thmu ban ïada ïa ka mariang bad noh synniang sha ka lawei kaba kham khuid bad kaba kham bun ki jingthung jingtep.
Ha ka jingrakhe Gandhi Jayanti ha ka Durbar Hall ha kane ka juh ka sngi, u Lat u la leit buh syntiew na ka bynta u Mahatma Gandhi bad Lal Bahadur Shastri ha ka lyngkhuh sngi kha jong ki. U Lat u la sam ruh ïa ki cheque kiba T 1, 11,000 ka jingai jingïarap pisa ïa saw tylli ki Gandhi Kendra – Laitkroh Kasturba Gram Seva Kendra, Tuber Kasturba Gram Seva Kendra, Jambal Kasturba Gram Seva Kendra bad Magupara Kasturba Gram Seva Kendra kum shi bynta ka Gandhi Jayanti.
Ha ka jingai jingsngewnguh ïa ki nongtei ïa ka ri, Mahatma Gandhi bad Lal Bahadur Shastri, u Vijayashankar u la ong ba ngi ïoh mynsiem ban pynurlong ïa ka jingthmu ïa ka India jong u Gandhi bad kiwei kiwei ki riewpawkhmat jong ka ri. U la ong ba u kmen ban ïohi ïa ka jingbun ki briew na Meghalaya kiba la wan sha ka Raj Bhavan ha kane ka sngi. U la ong ba yn dang pynlong shuh shuh kine ki jait prokram ha ki sngi ban wan ha Raj Bhavan ki ban ai jingmyntoi ïa ki briew.
Ka Editor jong ka The Shillong Times, Kong Patricia Mukhim ka la ai jingkren ha kane ka sngi. Ka la ïaroh ïa ki sienjam jong ka Raj Bhavan ban pynlong ïa kane ka prokram ban rakhe ïa ka Swachhata Hi Seva bad Gandhi Jayanti. Ka la ban jur halor ka jingpynïasoh ïa ka jingkhuid bad ka jingim ba man ka sngi bad ki rukom ha ka deiriti, ka ba pynshlur ïa ka jingpeit ïa ka Swachhata kaba long shi bynta jong ka jingim ba man ka sngi. Ka la ong ba dei ban rakhe ïa ka Swachhata Diwas baroh shi snem khnang ba baroh ki peit bniah ïa ka jingkhuid bad ka wan ka rukom treikam jong baroh kawei ka imlang sahlang ha kaba baroh ki don bynta ha ka jingkhuid.
U Lat u la sam ïa ki khusnam bad ki syrnot ïa ki nongjop jong ka jingïakhun thoh essay bad jingïakhun dro jingdro ba la pynlong da ka CBC Shillong, National Book Trust of India (NBT) ha ka jingïatreilang bad ka District Education Office, halor ki phang Swachhata and Poshan (nutrition) kaba la pynlong hapdeng ki khynnah skul jong ka East Khasi Hills.
Shuh shuh, u Lat u la pyllait paidbah ïa ka Mobile Library jong ka National Book Trust na Raj Bhavan. Kane ka dei shi bynta ka prokram mobile book exhibition kaba wanrah ïa ki kot sha ki jaka ba jynjar ban poi, ki jaka nongkyndong jong ka ri. Ka National Institute of Fashion Technology (NIFT) Shillong bad ka tnad Sericulture jong ka jylla ruh ki la pyni ïa ki jain bad kiwei kiwei ki tiar kiba pyndonkam ha ka kam thain jain bad ruh ki jain Khadi ha kane ka sngi.
U Myntri ka Sorkar Meghalaya ba dei khmih ïa ka tnad Animal Husbandry and Veterinary, Bah AL Hek bad kiwei kiwei ki ophisar jong ka Sorkar Jylla bad ka Sorkar Pdeng ki la ïashim bynta ha kane ka prokram ba long baroh shi sngi.
