Shillong, Naiwieng, 07: Lai ngut ki samla pule jong ka skulbah North Eastern Hills University (NEHU) ki la kem pang kynsan ha ka sngi Palei hadien ba ki la shah jingit la palat 48 kynta ha phyllaw jong kane ka skulbah naduh ka 5 tarik mynta u bnai.
Ha ka por kumba 4 baje noh phai sngi, kawei napdeng ki arngut ki samla pule kynthei jong ka skulbah North Eastern Hills University kiba la shah jingit la 48 kynta ka la kem pang namar ka jingtlot jong ka met bad ïa kane ka samla pule la pynkit noh marmar sha ka Clinic kaba don ha skulbah NEHU ban ïoh jingsumar.
Tang ha por kumba 9:10 baje mynmiet la ïoh jingtip ba u General Secretary jong ka North Eastern Hills University Students Union (NEHUSU) u samla Toniho Kharsati bad u Organising Secretary jong ka KSU NEHU Unit u samla Aiboklang Nongsteng ki la shah pynkit noh sha Shillong Civil Hospital, namarba la ban palat ka jingtlot jong ka met. Kine ki samla ki rai ba ynda la koit kin bteng biang ïa ka jingshah jingit.
Kat haduh mynta ka dang don sa kawei ka samla pule kaba la ïoh ïa ka dawai drip ha ka jaka shah thngan hadien ba ki doktor kiba don ha Clinic jong ka skulbah NEHU ki la lap ba kane ka samla pule ruh ka la don hapdeng ka jingtlot namar ka jingshah thngan.
Ki nongïalam jong ka Khasi Students Union (KSU) ki la leit jngoh ïa kane ka samla pule bad ïa kiwei ruh kiba dang don hapdeng ka jingshah jingit ha phyllaw jong ka skulbah NEHU.
Ka jingshah jingit ba khlem pud sngi da ki samla pule ka skulbah NEHU ka la kynjoh mynta la palat48 kynta naduh ba ki la sdang ha ka 5 tarik mynta u bnai ban dawa ïa u Vice Chancellor u Prof. PS Shukla, ïa u Registrar u Omkar Sing bad ïa u Deputy Registrar (Administration) u Amit Gupta ba ki dei ban hiar shuki noh mardor.
