Shillong, ïaïong, 22: Ka Ministry of Home Affairs jong ka Sorkar India ka la pynmih ïa ka jingpynbna ha ka Lah Sngi u Blei ban pyntip ba baroh kawei ka ri India kan ïam briew na ka bynta lai sngi, kata, ar sngi kynthih ha ka 22 tarik bad ka 23 tarik mynta u bnai bad kynthup ruh ha ka sngi ontep ïa ka met ba sah jong u Pope Francis ha ka sngi Saitjaiñ.
Ha kine ki lai sngi, ïa ka lama jong ka ri pynher tang shiteng ha baroh ki ophis treikam bad baroh ki jingleh rong leh tamasa jong ka Sorkar yn sangeh lut.
Ka Sorkar Meghalaya ruh ka la pynmih ïa kane kajuh ka jingpynbna.
Ka Sorkar ha Delhi ka la buh sngi kham mynshuwa ban pyllait paidbah mynta ka sngi Baar ïa ki 330 tylli ki bos elektrik hynrei la pynsangeh noh ïa kane ka prokram hadien ba ka Sorkar India ka la pynmih ïa kane ka jingpynbna.
Ki bor pynïaid jong ka Vatican ki la pyntip ba ïa ka met ba dang sah jong u Pope Francis yn sa tep don burom ha ka Iingmanebah St. Mary Major kaba don ha nongbah Rome, kaba long ruh ka Iingkyntang kaba u Pope Francis u ieid thep mynsiem bha.
Ha kane ka ingmane, u Pope Francis u ju smat bha ban leit pynlut por ha ki jingduwai, khamtam ynda la wan phai na ki jingleit jngoh ïa ki paidkhristan shabar ri.
Ki bor pynïaid jong ka Vatican ki la pynthikna ruh ba ïa ka met ba dang sah jong u Pope Francis lah ban sa rah shipor sha St. Peter’s Basilica ha ka 23 tarik, Ïaiong, 2025, ynda la ïoh jingmynjur shwa na ka College jong ki Cardinal, khnang ba yn dup ailad ïa ki paidriewngeit ban ai khublei khatduh ïa u Pope Francis.
U Dean jong ka College ki Cardinals, u Cardinal Giovanni Battista Re, u la pynlong ïa ka General Congregation naduh ka 22 tarik, Ïaiong, 2025 ban pynkhreh na ka bynta ka jingïalang ba kyrpang ban jied ïa u nongmih bujli ba thymmai, ïa kaba la khmihlynti ban pynlong hapdeng ka 5 tarik haduh ka 10 tarik u Jymmang, 2025.
Ha ka sngi ontep ïa u Pope Francis yn sa leit ïashim bynta da kiba bun ki nongïalam jong ki ri ka pyrthei, kynthup na ka ri Italy bad ka Sorkar India ka la pynmih ïa ka jingpynbna ban pynlong ïa ka jingïambriew kaba lai sngi.
Ha Jyllaniambah Shillong ki paidriewngeit ki la ïam briew ha ka sngi Baar halor ka jingkhladnoh jong u Pope Francis da kaba ïashim bynta ha ka jinglehniam jong ka Mass kyrpang ban duwai na ka bynta ka jingjahthait bymjukut jong ka mynsiem une u nongsharai mynsiem ba hakhliehduh jong ka Balang Catholic uba long u nongmih bujli jong u Jisu Khrist hangne ha sla pyrthei.
Ïa ka jinglehniam ha Iingmanebah Cathedral, Laitumkhrah la pynbynta ïa ka Mass Bakhuid da u Lyngdoh Sad jong ka Jyllaniambah Shillong u Most Rev. Victor Lyngdoh ryngkat ka jingsynran lang jong u Bishop Synrop u Most Rev. Bernard Laloo, u Vicar General u Rev. Fr.Richard Majaw bad kiwei kiwei ki Lyngdoh Sohblei.
Ha Mawlai Parish, ki paidriewngeit ki la ïashim bynta ha ka ka jinglehniam jong ka Mass Bakhuid ba la pynbynta da u Parish Priest u Rev. Telesphores Nonglang ryngkat ka jingsynran lang jong u Asst. Parish Priest u Rev.Fr. Jose Varickaseril, u Vice Provincial jong ka Guwahati Province u Rev. Fr. Vivan Mukhim, u Asst. Parish Priest jong ka Parish Sonapahar u Rev. Fr. Roland Kharkrang bad u Fr. Sylvester Kharkongor.
