Washington, Naitung 14: U President barim jong ka United States u Donald Trump u la lait thaw na ki tyrsim jong ka jingiap hadien ba u la shah siat bad mynsaw na ki bynta jong ka skhor ka mon katba u dang ai jingkren ha ka rynsan ialap elekshon ha nongbah Pennsylvania.
U nongsiat uba dang 20 snem ka rta, u la siat haduh saw kuli ïa u Trump hynrei tang uwei u la shei ïa ka skhor ka mon jong u Trump bad ha kane ka jingjia uwei u nongleit sngap elekshon ula ïap bad arngut ki la mynsaw jur na ka jingshah synreit kuli.
Une u nongsiat u dei uba la tip kyrteng kum u Thomas Mathew Crooks uba la 20 snem ka rta na ka shnong Bethel Park, Pennsylvania.
Ka video ka pyni ba u Donald Trump u la rah ïa ka kti bad ktah ïa ka skhor kamon ha shuwa ba un dem shapoh katba u nongsiat u dang siat ia ka suloi na ka bynta kaba shapoh jong ka rynsan.
Ki Pulit Secret Service jong ka US ki la tur wutwut sha u Trump bad ki la ieng ban iada ia u halor rynsan ha shuwa ba kin ïalam noh ïa u sha ka kali. Wat hapdeng ka jingmynsaw, u Trump u la kynhoi da kaba rah kti sha ki paidbah shwa ba un leit noh sha ka kali.
Ka FBI ka la ithuh ïa u nongsiat uba la kyllon ïap halor jong kawei ka jingtei kaba don marjan bad kane ka jaka ba pynlong ïa ka jingialap elekson.
Ha ka jingthoh ha ka Truth Social Network, u Trump u la ong ba u kuli u la sam lyngba ïa ka bynta ba shaneng jong ka skhor kamon.
Ka video ka la pyni ruh ïa ka jingkhah ka snam ha ka skhor bad ka ngab jong u Trump katba ki Pulit ka US Secret Service ki dang ïalam noh ïa u.
