Shillong, Nailar, 18: Kawei ka longïng ha Lumparing, Shillong ka la lait thaw da ka said na ki tyrsim jong ka jingïap ha ka jingjia ba shyrkhei kaba la jia ha ka step sngi U Blei kumba 2:00 baje mynstep.
La ong ba ha kane ka por, u pyrthat uba khlaiñ bor u la pom ha syndah jong ka ïng u Bah Silestar Tariang haduh ba la mong ka khyndew bad kyndat sha tnum ïng.
Lah ban ïohi ruh ba ki Meter Light bad Switch ki la bthei lut na ka jingpom u pyrthat bad thaba ka leilieh, ki jingkhang ït ki la julor.
Shuh shuh ha kata ka por, ka dei ba lip ka bording bad baroh kiba don ha ïng ki dang ïohthiah lyngngai hynrei u pyrthat ba khlaiñ bor u la pynkyndit thiah ïa ki.
Kane ka jaka ka dei kaba hap ha Riat Laban Kynjat Phutbol Block-C, Lumparing, ha kaba u Rangbah Shnong bad u Rangbah Dong ki la her wut wut tang shu ïoh jingtip ki la leit jurip bad pyntip sha ki bor ba dei khmih jong ka Meghalaya Energy Corporation Limited (MeECL).
Tang hapoh khyndiat kynta ki nongtrei ka MeECL ki la leit ban maramot bad pynring thymmai ïa ka bording ha kane ka ïng.
