Shillong, Jymmang, 10: Ki nongleit nongwan kiba ïaid lynti lyngba ka surok Shillong-Jowai na Laitumkhrah ban mih sha Fire Brigage, Laitumkhrah ha ka sngi Saitjaiñ ki la lyngngoh haba ki Pulit pynïaid kali kim shym la shah shuh ban ïaid lyngba nakhmat surok ka ophis treikam jong ka tnat Fire and Emergency Service hadien ba la lap ïa kawei ka pla rong ïong ba la shu iehnoh harud surok mar pyrshah ka Traffic Booth.
Kane ka jingbym shah ïaid ïa ki kali najan kane ka jaka, ka long halor ka jingsuba ba don u bom hapoh ka pla.
Ki Pulit ka kynhun Bomb Squad kiba la wan poi ryngkat bad uwei u ksew ki la ker kut ïa ka jaka ba don ka pla. Hynrei ynda la khynra ïa ka pla la lap pynban ïa ka pliangja, ki kot khalai, u mobile charge, ki jaiñ bad kiwei kiwei ki tiar.
Hadien kane, ïa kane ka pla la rah noh da ki Pulit ka Laitumkhrah Police Station bad mynta ki dang pynlong ka jingwad ïa u trai jong kane ka pla.
