Shillong, Nailur, 15: Ki misteri kiba dang shu poi ha ka step Lah Sngi u Blei ban trei ha kawei ka iing ba dang shna ha Nongrah, Dong Brei, Shillong ki la kyndit kumba iuh tdong bseiñ ban lap pynban da ka met jong i heprit Insaphira Lyngdoh Mawnai, 4 snem ka rta, iba la jah na phyllaw iing naduh ka step sngi U Blei.
Marmar ki Misteri ki la pyntip noh ïa kane ka jingjia sha ki bor shnong bad ki bor synshaw shnong ka nongrah Dong Brei ki la pyntip noh sha ki Pulit.
Ka kmie bad u Kpa tang shu ïoh jingtip ba la lap ïa i khun kynthei ba la jah, ki la leit wut wut hynrei kaba pynpait dohnud ïa ki ka long ba i khun kynthei i la shu thiah lyngktop ha madan bad la ban da u mawheh nalor ka met da ki riewsniew.
U Superintendent of Police ka East Khasi Hills District u Bah Vivek Syiem ruh u la leit jurip sha ka jaka ba la lap ïa ka metïap jong i heprit Insaphira.
Ïa ka met jong i heprit Insaphira la pynkit noh sha NEIGRIHMS Hospital ban leh ïa ka post mortem shwa ban aiti noh sha ki bahainghasem ban pyndep ïa ka jinglehniam ba khatduh.
